Chinland Ralkap Nih Tonzaang An Lak Pin Ah Thangtlang An Phomh Rih

Thantlang khuapi um sac ralhrang sakhan cu chinland ralkap hna nih hriamngan in an kah, Chin ramkulh, Thantlang khuapi um SAC ralhrang sakhanpi cu Chinland ralkap CNA le ṭangṭi phu hna nih nizan 2024, May 20 ah hriamngan in an kah, tiah theih a si. n”Nizan May 20 ah hriamngan kan tuah mi hneksaknak ca ah tiin Thantlang khuapi um SAC ralhrang sakhan cu kan kah, an sakhan chung ah hriamngan cu a tla i a puak, atu cu kahdohnak a dai cang” tiah Chinland ralkap CNF/A in chimphuannak nawlngeitu Salai Htet Ni nih Lungmili Post ah a chim.

Kahdohnak ah SAC ralhrang thi mi le hliam pu mi an um le um lo cu kan theifiang kho rih lo, tiah a chim chap. Thanthlang khuapi hrambunh palik sakhan telh in SAC ralhrang nih umhmun an khuarnak cheukhat cu Chinland ralkap CNA le CDF ṭangṭi phu hna nih a liamcia kum ah an rak laak khawh nain SAC ralhrang nih cunglei le hriamngan kahdohnak a tuah chih. Cu pin ah tanglei in thazaang zong a chap lengmang caah mizapi ralkap hna nih hnulei an tolhtak chung, tiah kan theih.

Thawng peh Chinram, Tonzaang khuapi cu nihin May 21 zing ah Chin hriamtlai ṭangṭi phu nih an laak i SAC ralkap hman mi hriamnam 50 leng an laak kong CNF/CNA in chimnak nawlngei Salai Htet Ni nih a chim. “Nihin zinglei ah Tonzaang khuapi cu a ningpi in an laak cang, SAC ralkap nih an hman mi hriamnam 50 hrawng zong an laak khawh, SAC ralkap cheukhat cu an zaam i hmunram thianhfelnak an tuah lio, atu cu Tonzaang khuapi cu SAC ralkap an um ti lonak hmun a si cang,” tiah CNF/CNA in chimnak nawlngei Salai Htet Ni nih cun a chim.

A luancia May 19 ni ah Chinram, Tonzaang peng, Cikha khuapi um SAC ralkap sakhan vialte an laak dih hnu ah khuapi a ningpi in CNA le CDF ṭangṭi phu nih an rak laak, nihin May 21 zinglei ah Tonzaang khuapi an laak ṭhan i Tonzaang peng a ningpi in Chin hriamtlai ṭangṭi phu nih an laak dih cang. A luancia May 15 ni ah thawk mi Tonzaang khuapi kahdohnak ah SAC ralkap thi le hliampu mi an tam i tlaih mi zong an um, cu kahdohnak ah cun SAC ralkap nih vanlawng in kahdohnak an tuah i bomb an thlak caah tualchung mi zong a himnak hmun kawl in ral an zaam, tiah theih a si.

Nizan May 20, zanlei suimilam 5:30 hrawng ah khan CNA le CDF ṭangṭi phu nih Thantlang SAC ralkap sakhan cu hriamngan le tanglei in meithal he an kah hna, cu kahdohnak ah cun CDF-Thantlang in ralkap pakhat hliam fak tuk lo a tuar, SAC ralkap lei in thi le hliam an um le um lo kong fiang in theih a si rih lo kong CDF-Thantlang GS Salai Khamh Pek Lian nih The Chin Post ah a chim.