SAC Nih Tonzaang Ah Vanlawng In Voi 40 Hrawng A Kah Caah Khuami An Zaam Dih + Video
CNA hruainak in Chinland Council ralkap hna nih Tonzaang khua laak kahdohnak an tuah thawk in SAC nih Tonzaang khua cu vanlawng in voi 40 nak tlawmlo a kah caah Tonzaang khuami vialte an zaam dih, tiah Tonzaang peng ukhruaitu bu nih thawng a thanh. SAC nih Tonzaang khuachung ah vanlawng in kahdohnak a tuah ruang ah Khawvom Laysan sang chung inn 30 leng an rawk i, Lungtak le Phaitu khua hna zong ah Biakinn tel in inn 10 hrawng an rawk.
Nihin May 21 zinglei sml. 5:00 in zinglei sml. 9:30 tiang Tonzaang khuachung ah CNA hruai mi Chinland Council ralkap le SAC ralkap karlak ah kahdohnak a um tiah Tonzaang peng ukhruaitu bu nih a langhter chap. Tonzaang khua cu nihin zinglei ah tlamtling te in kan laak cang. SAC lei miruak 10 hrawng kan char i meithal zun 50 hrawng zong kan laak,” tiah Salai Htet Ni nih a chim. Tonzaang peng chung kahdohnak ruang ah hin Tonzaang khuapi le a kiangkap khuate 15 hrawng in ralzaam 5,000 leng an um, tiah theih a si.
Thawngdang rel chap, Sagaing ramṭhen, Kalaymyo ah SAC ralkap nih ralkap tlakter ding ah mino an tlaih hna i hramhram in training an kaiter hna ruang ah nulepa an lungre a thei ngai hna. May thla hramthawk ah SAC nih voi hnih tiang tlaih a tong mi mino training an kaiter cang hna, tiah theih a si. Kalaymyo khuapi ah SAC nih training a pek mi hna lak ah a tam-u cu SAC ralkap a dirkamh mi le hramhram in tlaih mi mino an si hna caah fale ca ah nulepa an lungre a thei ngaingai,” tiah Kalaymyo, Aungthitsa sang mi nu pakhat nih a chim.
SAC nih Kalaymyo sang cheukhat ah ralkap tlakter ding ah kum tling mi mino mincazin cu sangbawi pawl an laakter hna. Zanlei suimilam 6:00 hnu ah aa chawk mi mino pawl cu an ral khun hna i ralkap tlakter ding ah an tlaih hna, tiah theih a si. “Khual cazin kan check lai tiin inn kip ah lut in mino pawl an tlaih hna, cun khuapi chung check gate ah hramhram in an tlaih hna ruang ah nulepa an lungre a thei i a cheu cu a himnak hmun ah an zaamter hna,” tiah tualchung mi nu pakhat nih a chim.
Atu lio Kalaymyo cu SAC ralkap nih khuachung ah chekhlatnak an tuah peng i Kalay peng chaklei zong ah tualchung hriamtlai phu he an i kap peng i kaphnih kar kahdohnak a fak ngai, tiah theih a si, mah hi https://www.facebook.com/thehakhapost/videos/1927502447685993 hmeh law a video na zoh khawh lai.
