CDF-Hakha Nih Kahdohnak Kong He Pehtlai In Thawngthanhnak An Tuah

Chinland Council nih a kalpi mi Tonzaang le Cikha khuapi kahdohnak Operation Exodus ah CDF-Hakha cu an i tel i, kahdohnak ah CDF-Hakha chungtel Salai Peng Tu Thang le Salai Van Duh Peng nih nunnak an pek. A luancia May 18, 20 le 30 ah khan Operation Exodus bawmhnak caah Rung Operation cu Hakha khuachung ah CDF-Hakha nih an tuah i, SAC lei pahnih hmunril ah an fim hna pinah pahnih an hliamh hna kong CDF-Hakha nih an thanh.

Cupinah June 1 ah Hakha khuachung, luatnak lungphun ah hmun a khuar mi SAC ralkap hna cu bomb voi hnih an thlak hna i Lamrukton le Cawbuk Gate zong ah kahdohnak an tuah. SAC lei khawnden kong ah thawngfiang theih a si lo. Operation Exodus ah nunnak a liam mi CDF-Hakha ralkap pahnih cu upatpeknak an langhter i, “Ralhrang hriamtlai hna zong CDM tuah khawh a si, lunglawm tein kan in don hna,” tiah CDF-Hakha nih SAC hriamtlai hna cu CDM tuah ding in an sawm hna.crd- The Chin Post.

Thawng dang: Sittwe Peng, Byinephyu Khua Mi 41 Cu SAC Ralkap Nih An Thah Hna. Rakhine ramkulh, Sittwe peng, Byinephyu khua ah nu le ngakchia telh in tualchung mi cu a luancia May 29 ni ah rallam a sial mi SAC ralkap 100 hrawng nih an rak tlaih hna i nihin June 1 ah pa 41 an thah hna, an ruak belte hmuh a si rih lo, tiah tualchung mi nih an chim. “Byinephyu khua ah nu le ngakchia, tarnu tarpa cu motor in an kalpi hna i Sittwe khuapi ah an chiah hna,

Pa tu cu an thlah hna lo i nihin i thawngpang kan don ning ah cun minung 41 an thah cang hna, an ruak belte cu khoika an chiah kan thei lo, cheukhat nih cun khuachung ah an hlonh sawh an ti,” tiah thawng laaknak hrampi pakhat nih a chim. “A luancia May 29 ni ah minung 4 hrawng, May 30 ni ah minung 10 le nizan May 31 ni ah minung 27 tiin a bu in SAC ralkap nih an thah hna,” tiah thawng laaknak hrampi pakhat nih cun a chim.

Byinephyu khua a lut mi ah cun Daw Saw Mya Yaza Lin hruai mi Arakan Libration Party(ALP/ALA) ralkap zong an i tel i SAC ralkap nih a bu in tualchung mi an thah hna lio zong ah ALP/ALA ralkap nih an bawmh hna, cu pin ah tlaih a tong mi chung in mino cheukhat cu SAC ralkap nih ralkap tla ding ah an motor in an kalpi hna, tiah thawng laaknak hrampi nih an chim. Nikum 2023 lio zong ah rallam a sial mi SAC ralkap pawl cu Byinephyu khua ah lut in chekhlatnak an rak tuah i tualchung mi cu a bu in an rak thah hna, tiah theih a si.