Hakha Khuapi Caah Ralhrang Thawngthanh Cu A Poi Ko Kan Ti Lai Maw
Lai phung in nan kan nawl lawng ah dawr khar le minung panga nak tam i pumh lo ding nawl chuah mi kan ngol lai tiah SAC nih an ti, Hakha khua, Khuathar sang chung dawr khar dih ding le minung panga nak tam i pumh lo ding in ralkap council nih nawl a chuah mi cu, Lai phung in nan kan nawl lawng ah kan in ngolpiak hna lai tiah an chim tiah kan theih. Kan hnu April thla 12, Hakha Khuathar sang ah SAC rianpek mi minister pawl motor tlar cu CDF-Hakha nih an rak kah hna.
CDF nih Dawr le Biakinn an i cherhchan ti in SAC nih Hakha khuathar dawr pawl khar dih ding le minung panga nak tam i pumh lo ding in April 22 ah nawl an rak chuah. “Dawr khar ding, biakinn ah minung panga cung in but lo ding ti mi cu West Nothern Military Command nih nawl a chuah mi a si caah fawi tein a ngah lo. Lai phung in nawlnak nan tuah lawng ah nawl chuah mi kan in ngolpiak hna lai an ti. Asinain hriamtlai kap hnih kar a si caah a si kho lai lo.
Atu thla (June) chung kan lut cang i a caan an chap lai maw, zeitin an tuah lai ti kan cuanh ko hna,” tiah Khuathar sangmi pakhat nih Khonumthung ah a chim. Hakha khuanu khuapa le Khrihfa biaknak hruaitu hna nih Lai phung sathi luanh in an kan nawl lawng ah nawl chuah mi kan leet (ngol) lai tiah SAC nih an chim ti a si. 2024 April 22 in June 20 tiang dawr khar ding SAC nih hramhram in nawl a rak chuah mi ruang ah Khuathar sang chung dawr vialte thla hnih deng an khar cang hna i biakinn zong ah an i pum kho lo.
Khuathar sang ah a um mi biakinn 11 cu pumh khawmh khawh lo in an um tiah theih a si. Thawng dang relchap, Bago ramṭhen, Okpho peng bomb puahnak ah SAC ralkap pathum an thih hnu ah tualchung mi tam ngai tlaih an tong i Ko Kala ti mi pa pakhat cu SAC ralkap nih a mit pahnih ning in an khoih i an hrem kong, Thayarwaddy pengkomh PDF in ṭuanvo ngei pakhat nih a chim. A luancia June 4, zinglei suimilam 10:00 hrawng ah Okpho peng Waing khua palik sakhan ah zuu ding in a chuak mi SAC ralkap 5 cu.
Thayawaddy pengkomh Battalion 3802, company 4 nih lampi hmun khat ah TNT bomb lung 3 in an puahhnawh hna i minung pathum an thi, pahnih an hliam a fak ngai, tiah theih a si. Bomb puahhnawh in SAC ralkap pathum an thih hnu ah palik sakhan pawng ah a um mi tualchung mi 17 cu SAC ralkap nih an tlaih hna i minung 12 cu thlah ṭhan an si nain Ko Kala Lay, Ko Zaw U, Ma Aye Moe, Ma Yin Aye le a dang pakhat cu nihin tiang an thlah rih hna lo, hren rih mi minung 5 lak ah palik sakhan pawng ah Mohinga a zuar mi Ko Kala Lay cu.
SAC ralkap nih a mit pahnih ning in an khoih i cikcin khih in an hrem, tiah theih a si. “Palik sakhan pawng ah Mohinga zuar mi Ko Kala Lay cu PDF nih bomb an tarh lio ah “na hmu hna lo maw” tiin a mit orhlei an khoihpiak, cun “ralkap ti hngalh ko bu in Mohinga kheng khat ah Kyats 1,000 in na hei zuarh hna” tiin a mit kehlei an khoih ṭhan, atu cu Waing palik sakhan ah an hren,” tiah Thayarwaddy pengkomh PDF in ṭuanvo ngei pakhat nih a chim.
