Lamzang Khua Mino Pawl Cu SAC Ralkap Nih An Tlaih Hna
Chinram, Tedim khuapi he meng 3 hrawng aa hlat mi Lamzang khua mino pawl cu nihin June 8 zing lei ah SAC ralkap nih an tlaih hna i khua mi zong an pumh hna pinah chekhlatnak an tuah hna, tiah tualchung mi pakhat nih a chim. Lamzang khua mi pakhat nih cun, “Tuzing lei ah SAC ralkap pawl khuachung ah an lut i meithal voi 10 an puah, hriamngan zong an kah i khua mino an tlaih hna, khua mi zong an pumh hna hnu ah chekhlatnak an tuah hna,” tiah a chim.
Lamzang khua ah a lut mi SAC ralkap pawl nih deika i Biakinn ah thla a cam mi tualchung mi zong Biakinn chung ah an hren hna i tawh an hrenh khanh hna. Lamzang khua mi cheukhat cu khua chingchang le lo hna ah an zaam hna, tiah tualchung mi nih an chim. Thawngd ang rel chap, Lai phung in nan kan nawl lawng ah dawr khar le minung panga nak tam i pumh lo ding nawl chuah mi kan ngol lai tiah SAC nih an ti.
Hakha khua, Khuathar sang chung dawr khar dih ding le minung panga nak tam i pumh lo ding in ralkap council nih nawl a chuah mi cu, Lai phung in nan kan nawl lawng ah kan in ngolpiak hna lai tiah an chim tiah kan theih. Kan hnu April thla 12, Hakha Khuathar sang ah SAC rianpek mi minister pawl motor tlar cu CDF-Hakha nih an rak kah hna. CDF nih Dawr le Biakinn an i cherhchan ti in SAC nih Hakha khuathar dawr pawl khar dih ding le minung panga nak tam i pumh lo ding in April 22 ah nawl an rak chuah.
Dawr khar ding, biakinn ah minung panga cung in but lo ding ti mi cu West Nothern Military Command nih nawl a chuah mi a si caah fawi tein a ngah lo. Lai phung in nawlnak nan tuah lawng ah nawl chuah mi kan in ngolpiak hna lai an ti. Asinain hriamtlai kap hnih kar a si caah a si kho lai lo,. atu thla (June) chung kan lut cang i a caan an chap lai maw, zeitin an tuah lai ti kan cuanh ko hna,” tiah Khuathar sangmi pakhat nih Khonumthung ah a chim.
Hakha khuanu khuapa le Khrihfa biaknak hruaitu hna nih Lai phung sathi luanh in an kan nawl lawng ah nawl chuah mi kan leet (ngol) lai tiah SAC nih an chim ti a si. 2024 April 22 in June 20 tiang dawr khar ding SAC nih hramhram in nawl a rak chuah mi ruang ah Khuathar sang chung dawr vialte thla hnih deng an khar cang hna i biakinn zong ah an i pum kho lo. Khuathar sang ah a um mi biakinn 11 cu pumh khawmh khawh lo in an um tiah theih a si.
