Kahdohnak Tuah Ding In CDF-Matupi Brigade 1 Nih AA An I Sawm Mi Cung Ah Global Matupi CDF Supporting Committee An Hna Tla Lo

Global Matupi CDF Supporting Committee he pehtlaihnak a ngei lo i a ṭangṭi lo mi Chinland Defense Force – Matupi Brigade 1 nih CDF-Matupi Brigade 2 telh in CNA le mizapi ruahnak zeihmanh hal hmasa lo in miphun dang le ramkulh dang hriamtlai phu Rakhine ralkap AA i sawm riangmang in Matupi peng chung ah kahdohnak kalpi an timh mi cu Global Matupi CDF Supporting Committee kan hna a tla lo i fak piin duhlonak kan langhter, tiah Global Matupi CDF Supporting Committee nih nizan June 8 ah an thanh.

Global Matupi CDF Supporting Committee nih an thanh mi ah cun, “Hi hnu pinlei ah AA kong he pehtlai in a cang ding mi Chinram ramkhel buainak, zatlang le nuphung hnahnawh peknak le aa pehzul ding mi buaibainak dangdang vialte cu CDF-Matupi Brigade 1 nih nan liang cung ah i khinh in ṭuanvo nan laak dih a hau lai, cu kong ah cun CDF-Matupi Brigade 2 hmunram le mizapi nih kan theihpi hna lai lo i pehtlaihnak zeihmanh a um lai lo tiin mizapi kan in theihter hna,” tiah Global Matupi CDF Supporting Committee nih an langhter.

Global Matupi CDF Supporting Committee cu a liamcia 2021 July 30 ni ah ramchung ramleng um Global Cingtlang CDF Supporting Committee, Global Matu Doem Community, International Dai CDF Supporting Committee le International Ai-daak Community tiin phu ngan phu 4 nih rak dirh mi a si i Chinland Council dirkamh in CDF-Matupi Brigade 2 tang a um mi Battalion 2, Battalion 3, Battalion 4 le Battalion 6 tha pe in a bawmchantu Committee a si.

Chinland Defense Force – Matupi Brigade 1 tang ah a um mi Battalion 1 le Battalion 5 cu Chin hriamtlai phu unau (Chin Brotherhood) chungtel an si ve i atu lio Matupi peng kahdohnak kalpi timh mi ah Rakhine ralkap AA a sawmtu phu an si.crd- The Chin Post. Thawng dang: Okpho Peng Ah SAC Ralkap Nih Tualchung Mi Pakhat A Mit Pahnih Ning In An Khoih. Bago ramṭhen, Okpho peng bomb puahnak ah SAC ralkap pathum an thih hnu ah tualchung mi tam ngai tlaih an tong i Ko Kala ti mi pa pakhat cu SAC ralkap nih a mit pahnih ning in an khoih i an hrem kong, Thayarwaddy pengkomh PDF in ṭuanvo ngei pakhat nih a chim.

A luancia June 4, zinglei suimilam 10:00 hrawng ah Okpho peng, Waing khua palik sakhan ah zuu ding in a chuak mi SAC ralkap 5 cu Thayawaddy pengkomh Battalion 3802, company 4 nih lampi hmun khat ah TNT bomb lung 3 in an puahhnawh hna i minung pathum an thi, pahnih an hliam a fak ngai, tiah theih a si. Bomb puahhnawh in SAC ralkap pathum an thih hnu ah palik sakhan pawng ah a um mi tualchung mi 17 cu SAC ralkap nih an tlaih hna i minung 12 cu thlah ṭhan an si nain Ko Kala Lay, Ko Zaw U, Ma Aye Moe, Ma Yin Aye le a dang pakhat cu nihin tiang an thlah rih hna lo.

Hren rih mi minung 5 lak ah palik sakhan pawng ah Mohinga a zuar mi Ko Kala Lay cu SAC ralkap nih a mit pahnih ning in an khoih i cikcin khih in an hrem, tiah theih a si. “Palik sakhan pawng ah Mohinga zuar mi Ko Kala Lay cu PDF nih bomb an tarh lio ah “na hmu hna lo maw” tiin a mit orhlei an khoihpiak, cun “ralkap ti hngalh ko bu in Mohinga kheng khat ah Kyats 1,000 in na hei zuarh hna” tiin a mit kehlei an khoih ṭhan, atu cu Waing palik sakhan ah an hren,” tiah Thayarwaddy pengkomh PDF in ṭuanvo ngei pakhat nih a chim.