Matupi Peng, Ansuai Khua le Kanpetlet Peng, Chinletmun Khua ah SAC Ralkap Nih Vanlawng In Bomb An Thlak

Kanpetlet Peng, Chinletmun Khua Vanlawng Kahdohnak Ruang Ah Tualchung Mi Pakhat Thi, Minung 4 Hliamtuar. Chinram thlanglei, Kanpetlet peng, Chinletmun khua ah SAC ralkap nih nihin June 11 zinglei ah vanlawng in kahdohnak an tuah ruang ah tualchung mi pakhat a thi i minung 4 hliam an tuar, tiah theih a si. Chinletmun khua vanlawng kahdohnak ruang ah cun tualchung mi thi le hliam an um pin ah khuachung sianginn pahnih le umnak inn 6 a rawk, tiah theih a si. Atu zarh chung ah SAC ralkap nih Chinram thlanglei Mindat peng le.

Matupi peng ah a ruang um lo in timh ciammam tein vanlawng in kahdohnak an tuah i pehtlai in bomb an thlak ruang ah inn a rawk mi a tam, tiah theih a si. Hramhram in nawlngeihnak laak a si hnu ah SAC ralkap vanlawng kahdohnak ruang ah Chinram ah Biakinn 40 hrawng a rawk cang, tiah theih a si. RFA nih a khawmh mi cazin ning ah SAC ralkap nih hramhram in nawlngeihnak an laak ni thawk in tukum 2024 May thla dongh tiang ah SAC ralkap hriamngan le vanlawng kahdohnak ruang ah tualchung mi 1,942 an thi i, minung 3,866 nih hliam an tuar.

Rel chap: Matupi Peng, Ansuai Khua Ah SAC Ralkap Nih Vanlawng In Bomb An Thlak. Chinram thlanglei Matupi peng, Ansuai khua ah SAC ralkap nih vanlawng in kahdohnak an tuah i nizan June 10, zinglei suimilam 4:00 hrawng ah bomb an thlak ruang ah khuachung inn a rawk mi a um, tiah theih a si. Ansuai khua ah cun kaphnih kar kahdohnak um lo in SAC ralkap nih timh ciammam tein vanlawng in bomb an thlak ruang ah khuachung ah umnak inn 4 hrawng a rawk. Cu pin ah Matupi khuapi chung ah hrambunh in a um mi SAC ralkap nih hriamngan dongcat lo in an kah, tiah theih a si.

SAC ralkap nih atu hrawng cu Mindat le Matupi peng ah a ruang um lo in kahdohnak an tuah i kum dang nakin an tuah khun, a luancia ni tlawmpal chung zong ah Matupi—Mindat kar khuate hna ah SAC ralkap nih vanlawng in kahdohnak an tuah, tiah theih a si. RFA nih a khawmh mi cazin ning ah SAC ralkap nih hramhram in nawlngeihnak an laak ni thawk in tukum 2024 May thla dongh tiang ah SAC ralkap hriamngan le vanlawng kahdohnak ruang ah tualchung mi 1,942 an thi i, minung 3,866 nih hliam an tuar. Crd- The Chin Post.