PDF Nih SAC Ralkap Kahdohnak Ah A Thi Mi Ruak 40 Leng An Phum Hna
Nyaungshwe Peng Kahdohnak Ah A Thi Mi SAC Ralkap Ruak 40 Leng PDF Nih An Phum Hna. Shan ramkulh, Nyaungshwe peng kahdohnak ah a thi mi SAC ralkap ruak 40 leng cu thla thum tluk a rauh tiang ah char an si lo caah PDF nih an phum hna, tiah Bees Column in ṭuanvo ngei pakhat nih a chim. A luancia April 13 ni ah Nyaungshwe peng, Nyaunglaypin le Yaepu khua kar ah PDF le SAC ralkap kar kahdohnak a chuak mi ah a thi mi SAC ralkap ruak pawl cu thla thum tluk a rauh tiang ah.
SAC ralkap nih an char lo caah tualchung hriamtlai phu nih nizan June 16 ni PDF ṭangṭi phu nih an char i an phum hna, tiah theih a si.crd- The Chin Post. Relchap: 2024, January Thla In May Thla Tiang Ah SAC Chungtel 3,000 Deng An Thi I Sakhan 200 Leng An Sung. 2024, January thla in May thla tiang, thla 5 chung kahdohnak caan chung ah SAC ralhrang chungtel 3,000 tluk deng an thi i an sakhan 200 leng an sungh kong, Burma Fascism and Nationalism Watch (BFNW) nih nihin June 17 ah an langhter.
2024, January thla thawk in May thla dih tiang Myanmar ramchung SAC ralhrang sakhan laak kahdohnak ah SAC ralhrang nih an sakhan 218 an sungh kong, theih a si. Hi thla 5 caan chung ah SAC ralhrang le dohthlennak a tuahtu hna PDF, CDF, tlangcung hriamtlai phu hna karlak ah kahdohnak voi 2,000 leng a chuak. Thla 5 chung ah Kachin ramkulh ah SAC ralhrang sakhan 103, Rakhine ramkulh ah SAC ralhrang sakhan 63 telh in Chinram, Karen, Shan, Mon, Karenni ramkulh le Sagaing, Magway, Tanintharyi, Bago ramṭhen hna ah SAC ralhrang nih an sakhan tam ngai an sungh kong, Burma Fascism and Nationalism Watch (BFNW) nih an langhter.
Sakhan laak kahdohnak caan chung ahcun SAC ralhrang lei in palik chungtel pawl telh in 2,869 an thi i 2,813 nih hliam an tuar. Dohthlennak hriamtlai phu in minung 405 nunnak a liam ve i minung 903 nih hliamhma an tuar, tiah theih a si. Hi thla 5 chung kap 2 kar kahdohnak ruang ah nuhrin covo buar ruang le bomb puahkhehnak ruang ah Myanmar ram tualchung mi 1,153 nunnak a liam i minung 1,190 nih hliam an tuar, tiah Burma Fascism and Nationalism Watch (BFNW) nih an thanh mi ah an langhter chih.crd- Lungmili Post.
