Chin Brotherhood Nih Matupi SAC Sakhaan 1 An Lak Pinah Hriamnam Tak An Lak
Matupi khuapi sac battalion 304 cu Chin Brotherhood (CB Operation) nih tlamtlingte in an laak, hriamnam tampi an laak chih 2024, June 17 ah Matupi khuapi SAC ralhrang umhmun khuarnak Khah-Mah-Yah 304 battalion cu Chin Brotherhood (CB Operation) nih tlamtling tein an laak khawh cang, tiah theih a s. Khah-Mah-Yah 304 hi Matupi khuapi in a san nakbik tlangcung ah umhmun khuarmi Sah-Kah-Sah battalion pakhat a si, tiah an langhter.
Chin unau hriamtlai ṭangṭi phu le SAC ralhrang karlak zarh hnih leng kahdohnak a rauh hnu ah SAC ralhrang umhmun khuarnak sakhan cu tlamtling tein an laak, tiah kan theih. Kahdohnak hmun ah SAC ralhrang thi le hliamtuar an um, mipi ralkap nih hriamnam zeimawzat an laak chih, tiah an langhter. Khah-Mah-Yah 304 hi Than Shwe chan lio ah Chin mi Khrihfa nih Vailamtah nganpi an rak phunnak hmun a si i SAC ralhrang nih Vailamtah rawk in umhmun khuarnak sakhan ah an hman mi a si.
Thawng dang rel chap, Italy thlanglei hmunram ah thing in serchommi tilawng 2 cansualnak in minung 11 an thi, midang 60 leng an tlau, Italy ram, thlanglei rili ah thing in serchommi tilawng 2 pilnak a chuak i minung 11 an thi, midang 60 leng an tlau, tiah chiatṭhat zohkhenhtu phu nih an chim. Thing in serchommi tilawng pilnak ah chiatṭhat zohkhenhtu phu nih minung 51 an chanhchuah hna i mi ruak 11 an char, tiah theih chih a si.
Cu bantuk ṭhiam in tilawng dang pakhat cansualnak a ton ṭhan caah ngakchia 26 telhchih in minung 60 leng an tlau, tiah MSF charity group nih an langhter. Thing in serchommi tilawng 2 hna hi Libya in Turkey lei ah mipem ding hna phor in a kal mi an si, tiah UN aid agency nih an chim. Lampedusa pawng ah Italian rili hngaktu ralkap nih an chanhchuah mi hna hi Syria, Aigupta, Pakistan le Bangladesh hna ram in pek ding ah aa thawh mi an si, tiah an langhter.
