Kennedy Tlang SAC Ralkap Sakhan Cu Chinland Council Ralkap Nih An Laak Ṭhan Cang
Chinram, Tedim peng Kennedy SAC ralkap sakhan cu ZFU/PDF-Zoland nih a liamcia 2023 November 23 ah an rak laak nain a luancia June 18 ni ah khan SAC ralkap nih an laak ṭhan. ZFU/PDF Zoland nih an sungh mi Kennedy tlang sakhan cu nihin June 22 zinglei suimilam 9:00 hrawng ah Chinland Council ralkap ṭangṭi phu nih an laak ṭhan kong le Taingen sakhan zong Chinland Council ralkap kut ah a um kong, CDF-Hualngoram Defence Director Pu Puite sin in kan theih.
Tedim peng, Kennedy tlang sakhan cu Chinland Council ralkap ṭangṭi phu nih nihin June 22, zinglei suimilam 9:00 hrawng ah tlamtling tein an laak i sakhan ah thantar zong kan thlai cang, ṭangṭi phu nih hmunram thianhfelnak zong an tuah cuahmah, a rauh hlan ah Video chuah khawh kan rak i zuam lai,” tiah Pu Puitea nih The Chin Post ah a chim. Nizan June 21 ah The Chin Post telh in Chin Media cheukhat nih “CNA ṭangṭi phu nih a luancia January 16 ni ah an rak laak mi.
Taingen sakhan cu SAC ralkap pawl nih an laak ṭhan cang” tiin kan ṭial mi kong he pehtlai in Pu Puitea nih cun, “Taingen sakhan hi SAC ralkap nih an la kho rih, Chinland Council ralkap kut chung ah a um rih ko. An laak cang ti mi thawngpang kha a dik lo mi a si. SAC ralkap pawl hi Taingen thlacamnak tlang (Bethel) ah an um i kannih lei hi sakhan ah kan um, Drone zong in kan kah hna i atu tiang ah cun Taingen sakhan cu kan kut ah a um rih ko,” tiah a chim.
Tedim—Kalay lampi kam i a um mi Keneddy tlang sakhan kahdohnak ah hin CNA, CDF-Hualngoram, PDA-Tedim, CDF/CDM-Siyin, PDF Kalay – SR6, CDF-KKG Battalion (7), CDF-Zanniatram le Chin hriamtlai phu dangdang an ṭangṭi hna, tiah theih a si. Thawng dang rel chap, Gangaw peng ah 40mm bomb puahhnawhnak in kum 11 ngakchia pakhat nunnak a liam, Magway ramṭhen, Gangaw peng, Tharlin khua pawng ah 40mm Bomb aa lenh mi kum 11 ngakchia pakhat cu bomb nih a puahhnawh caah hmunril ah a thi i a pawng um mi a unau pahnih zong hliam an tuar, tiah tualchung mi nih an chim.
Nizan June 21, zinglei suimilam 9:30 hrawng ah Gangaw peng, Tharlin khua pawng caw inn ah a um mi unau pathum nih 40mm bomb lung khat cu an hmuh i zei thei lo in an i lenh caah a puahhnawh hna i kum 11 pa ngakchia pakhat a thi, kum 14 a upa le kum 11 pa ngakchia pakhat zong hliam an tuar ve, tiah tualchung mi pakhat nih a chim. Chinram, Rakhine ramkulh, Shan ramkulh le.
Sagaing ramṭhen telh in kahdohnak a fahnak hmunram hna ah cun leiphum mi bomb le hriamnam a puak rih lo mi a tam ruang ah tualchung mi thi le hliam hi nifatin ti tluk in an um kong, mi bawmchantu phu nih an chim. A liamcia 2023 kum chung ah leiphum mi bomb le hriamnam puak hrulh mi ruang ah Myanmar ram hmun kip ah tualchung mi 188 an thi, tiah UNICEF Myanmar nih tukum 2024 April 3 ah khan an thanh.
