YDF Ralkap 2 CNA Nih An Tlaih Mi Hna Thlahpiak Ding In YDF Nih A Hal
CNA nih an Tlaih mi YDF Ralkap 2 Thlahpiak ding in YDF nih a Hal. Matupi peng khuate ah CNA ralkap nih an tlaih mi Yaw Defense Force (YDF) ralkap pahnih thlahpiak ding in YDF nih July 9 ah halnak ca a chuah. Magwe ramṭhen, Gangaw peng ah hram a bunh i, AA le Chin Brotherhood he ral a do mi YDF ralkap pahnih cu July 7 ah khan Matupi peng, Zawngnak khua ah CNA nih an tlaih hna. Tlaih a tong mi YDF ralkap pahnih cu Ko Ok Thein le Ko Aung Thet Khine an si, tiah YDF nih a langhter. CNA nih YDF ralkap pahnih an tlaih mi kong he pehtlai in YDF nih.
CNA nih aruang um lo in kan ralkap pahnih an tlaih mi hna hi a rianrannak in an thlah hna a herh,” tiah ca an chuah mi ah an langhter. Hi kong he pehtlai hin CNF/CNA chimnak nawlngei Salai Htet Ni nih, “Bia hal awk kan ngeih hna caah kan kalpi chungmi hna a si. An hruaitu hna he biaruahnak kan ngei ta lai. Thlah an si lai le si lai lo cu ṭuanvo ngeitu nih an theih ko lai,” tiah a chim. Magwe ramṭhen ah hram a bunh mi YDF cu Cindwe khua laak kahdohnak le Matupi khua laak kahdohnak ah AA le Chin Brotherhood he ral an do ve, tiah theih a si.
Thawng dang: TNLA le PDF nih Shanram Chaklei Nawngcho Khua an Laak. Shanram chaklei ah a um mi Nawngcho khua cu TNLA, Mandalay-PDF le Danuh-PLF nih an laak khawh cang, tiah theih a si. Nawngcho ah a ummi SAC ralkap sakhaan pathum lak ah Kha Ma Ya (115) le Kha Ma Ya (114) SAC ralkap sakhaan pahnih cu TNLA le PDF nih June 26 le 27 ah rak laak cang. Nawngcho khualuhnak lamkam ah a um mi SAC ralkap Missile Battalion (606) hi a donghnak bik a taangmi a si. Cu sakhaan cu July thla thawk in TNLA, Mandalay-PDF le Danuh-PLF nih an doh i, nihin July 10 zinglei ah an laak khawh hi a si.
Nawngcho khuami pakhat nih, “Nizaan zaankhuadei kahdoh thawng kan theih. Vanlawng zuan thawng le bomb thlak thawng zong kan thei len i, nihin zinglei cun a dai cang. 606 sakhaan an laak cang an ti,” tiah Myanmar Now ah a chim. Mizapi ralkap nih Nawngcho khua an laak hnu ah khuachung inn a bauhtu mifir pawl le SAC ralkap thawngpang a petu dalan pawl, minung 60 hrawng zong an tlaih hna, tiah theih a si.
