Min Aung Hlaing Cu Caan Karlak Myanmar Rampi President A Si Cang
SAC ralkap nih Myanmar ram uknak an laak hnu in caan karlak President rian an khinhmi U Myint Shwe nih nihin July 22 ah SAC ralkap bawizik Min Aung Hlaing cu caan karlak President rian le nawlngeihnak vialte a ap cang, tiah SAC ralkap thawngzamhnak MRTV nih a phuan. Caan karlak President U Myint Shwe cu damlonak ruang ah riantuan kho lo in a um i, Min Aung Hlaing hi Clcaan karlak Myammar rampi President rian a pek, tiah an langhter.
Thawng dang: CDF-Hakha nih thongtla an chanhchuah mi hna lak ah nun chung thongthlak ding le CDF chungtel hna zong an i tel. Chinram, Hakha khuapi um SAC ralhrang kuttang palik sakhan cu CDF-Hakha nih July 20 ni zinglei suimilam 5:00 tluk ah luhhnawh in an kahdoh i palik 3 an thih pin ah hriamthil tam ngai zong an laak chih khawh i SAC ralhrang nih nun chung thongthlak ding in bia an khiahpiak mi hna le CDF chungtel hna telh in thongtla mi nu 13 le pa 59 zong an chanhchuah khawh hna kong, CDF-Hakha President nih a chim.
Khuapi chung ah kahdohnak voi 100 leng kan tuah cang i SAC ralhrang pawl an thazaang kan derter hna lai. Cun, an thazaang a der deuh in Hakha khuapi kan laak lai. A hnu bik kan i timh mi cu Hakha khuapi laak kahdohnak kalpi a si. Palik sakhan laak zong hi kan i timh mi ah aa tel ve mi a si. Atu cu thongtla vialte an chuak kho cang i a himnak hmun an phan dih cang,” tiah CDF-Hakha President nih Khonumthung ah a chim.
Thongthla mi hna lak ah Nu Biak Mawi Sung cu CDF hna tangka na bawmhchanh hna tiin SAC ralhrang nih a liamcia 2023, September 29 ni ah nun chung thongthlak ding in bia an rak khiahpiak mi zong aa tel. Cu pin ah CDF-Hakha chungtel minung 8, CDF-Senthang chungtel minung 5, ramkhel kong he aa pehtlai mi minung 30 le thil dang ruang ah thongthlak mi minung 15 zong an i tel, tiah a chim chap.
Hakha khuapi laak khawhnak ding ah “Rung Operation” cu 2023, November thla in kalpi hram an thawk i kahdohnak caan chung ah SAC ralhrang lei 30 tluk le an lei ṭang mi minung 10 an fimtawl cang hna kong, CDF-Hakha President nihcun a chim.
