Hakha Khuachung Ah Rung Operation An Kalpi Cuahmah

Chinram, Hakha khuapi ah Tilim Operation 4 bawmhnak ca ah Rung Operation kalpi cuahmah a si i khuachung ah CDF-Hakha nih kahdohnak an kalpi cuahmah, tiah theih a si. Hakha peng ah hrambunh mi Chinland Defense Force – Hakha nih Thantlang khuapi ah kalpi cuahmah mi Tilim Operation 4 bawmhnak ca ah tiin Hakha khuapi chung ah Rung Operation 4 an kalpi cuahmah ve i nizan September 13 zong ah voi hnih tiang khuachung ah kahdohnak an tuah, tiah theih a si.

Hi kong he pehtlai in CDF-Hakha President, Pu Hram Lian nih cun, “Tilim Operation 4 bawmhnak caah Rung Operation in nizan September 13, zing suimilam 3:30-4:30 tiang Parliament, Chief Minister le Minister pawl an umnak, cozah zung, Myanmar Economic Bank le Supaung zung kan kah. Cun, September 13, zan suimilam 8:30-9:00 tiang kan kah ṭhan hna nain khuachung a si caah thi le hliampu zat kan thei kho rih lo.

Kanmah lei tu cu kan him dih,” tiah The Chin Post ah a chim. September 13, zing kahdohnak ah khan Pu Ngun Ṭhio cu meithal khennak in a nunnak a liam i kanmah zong nih a poi kan ti tuk ve. Ralhrang lei meithal khennak a si, kanmah lei meithal kuan a si lo. Zahan zan kahdohnak ah cun mipi lei zong in aa hliam mi an um lo,” tiah CDF-Hakha President nih cun a chim.Thawng dang: Mizoram ramkulh, Zokhawthar khua mino pahnih tlaih le hren an ton mi kong he pehtlai in.

CDF-Hualngoram le Zokhawthar hruaitu pawl cu hmaitonh in biaruahnak an ngei i tlamtling tein a herh mi an i ceihmai kho, tiah theih a si. A luancia August 31 ah khan Chinram, Hualngo hmunram, Rihkhawdar khuapi ah CDF-Hualngoram ralkap pakhat cu kutthlak a ton caah Zokhawthar mino pahnih cu chekhlatnak tuah ding ah tlaih an rak si i, cu kong he pehtlai cun September 11 ah kaphnih hruaitu cu hmaitonh in biaruahnak an ngei i tlamtling tein thil sining an i ceihmai khawh caah kaphnih fonh in lunglawmhnak cathanh an chuah.

Cu an cathanh chuah mi ah cun Zokhawthar khua aiawh khua ukhruaitu phu, YMA, MHIP le CDF-Hualngoram lei in hruaitu 4 nih min an thut. Zokhawthar le Rikhawdar cu uktu cozah aa khat mi hmunram an si lo nain thisen aa tlai mi unau kan si i kan pupa chan in chiat ni, ṭhat ni ah lungrual tein a rak um mi kan si bantukin naihniam tein i pehtlaihnak a loh nakhnga lo a dik lo mi thawngpang cu .

Social Media ah taarlangh lo ding in mipi kan in nawl hna,” tiah an cathanh chuah mi ah an langhter. Atu bantukin tonbiaruahnak ngei hnu ah kaphnih in hnatlaknak ngeih a si i remnak ser a si cang caah mipi lei zong nih rak kan theihpi u law caan nih a liampi cang mi tharchuah ṭhan in a herh lo mi buainak chuahpi lo ding in kan in nawl ko hna,” tiah kaphnih fonh cathanh chuah mi ah cun an langhter chih.