Breaking News: Falam Khuapawng Ah CNDF Le SAC Kar Kahdohnak Fak
Falam khuapawng ah CNDF Le SAC kar kahdohnak a chuak,sac pakhat a thi i tualchung ngakchia pakhat hliam tuar, Chin ramkulh Falam khuapi pawngkam ah nihin May 13 ah SAC le CNDF karah kahdohnak a chuak i SAC lei pakhat a thi i tualchung ngakchia pakhat hliam a tuar tiah The Rihli Voice nih a langhter. Nihin May 13 chun slm 12: 30 tluk ah SAC le CNDF karah kahdohnak a chuah hi a si i SAC lei kah mi hriam nih khen ruangah Falam,dawr hlun sang um ngakchia kum 7 pakhat cu a ke ah meithal nih a hliamh tiah theih a si crd- CBN.
Thawng dang relchap- male khua kahdohnak ah sac 6 an thi, tualchung hriamtlai in minung 10 nunnak a liam, Sagaing ramṭhen, Kanbalu peng, Male khua ah SAC ralhrang, an kuttang palik le pyusawhti pawl nih umhmun an khuarnak sakhan cu dohthlennak hriamtlai phu hna nih 2024, May 7 ah luhhnawh in an kahdoh i SAC ralhrang lei in 6 an thih pin ah hriamthil pawl zong kan laak khawh chih, tiah mizapi ralkap No.1 Military Region sin in theih a si.
Kahdohnak caan chung ah SAC ralhrang lei in 6 an thi i meithal zuun 14, kuanfang 700 leng, kuanbawm 11, kut cheh bomb 1, Enagar 6, Jammer 1, Equipment 4, Uniform zuun 3 le hriamthil dang pawl zong an laak chih khawh, tiah theih a si. Cu kahdohnak ahcun SAC ralhrang Ṭah-Ṭah-Kah (13) in hriamngan zuun 60 leng an kah i Pyin Oo Lwin khuapi pawng um SAC ralhrang sakhan in Mi-35 helicopter 1 in cunglei kahdohnak voi 10 tiang a tuah.Mah pin ah raltuknak vanlawng 1 in voi 4 tiang bomb a thlak i Y-12 in bomb 60 reng lo a thlak” tiah No.1 Military Region nih Tachileik News Agency ah a chim.
Pyin Oo Lwin pengkomh, Thabeikkyin peng, Kyaukphyar khua um SAC ralhrang thazaang 70 tluk zong nih an rak kah bawmh hna caah dohthlennak hriamtlai phu in minung 10 nih ram le miphun caah an nunnak an pek i minung 17 nih hliam an tuar pin ah tualchung mi 1 zong a nunnak a liam, tiah theih a si. Kahdohnak ahcun Kanbalu pengkomh battalion 2, 3, Shwebo pengkomh battalion 3 le No.510 battalion hna an ṭangṭi i Kanbalu peng Pah-Kah-Phah le Khin-U peng Pah-Lah-Phah hna nih SAC ralhrang lei ral bawmtu pawl an kah bawmh ve hna, tiah theih chih a si.
