Paletwa Peng Ralzam Siangngakchia Caah Sianginn An Hon Cang

Chinram, Paletwa peng in Mizoram ah ralzam in aa dor mi siangngakchia hna nih fimcawnnak an pehzulh khawh nak ding ah India-Myanmar ramri hmun pakhat ah Paletwa Education Centre nih sianginn an hon, tiah theih a si. Paletwa peng chung SAC ralkap le AA kar kahdohnak ruang ah ral a zaam mi siangngakchia hna nih fimcawnnak an pehzulh khawh nak ding ah tiin Mizoram Lawngtlai District ramri khua pakhat ah sianginn an hon kong Paletwa Education Centre Director Saya Moses nih chim.

Paletwa ah sianginn hon ṭhan ding in timhlamhnak a um ti lo pinah siangcachim zong an um ti lo caah ralzam siangngakchia pawl cu sianginn an kai khawh nak ding ca ah timhlamh mi a si, tiah Saya Moses nih a chim chap. A hramthawk ah cun Middle le High School lawng hon ding in timhtuah a si nain nulepa nih nawlnak an tuah ruang ah Primary in High School tiang hon ṭhan a si lai. May 1 in minpek caan hon a si i May 20 in cacawn thawk a si lai, tiah a chim.

May 13 tiang min a pe mi 190 leng an si cang i khuate lei in a rak kai ding he an zapi ah 400 leng an si. Cachimtu ding minung 25 an um, tiah ṭuanvo ngei pakhat sin in theih a si. Sianginn honnak ding ah umṭhutnak le caholh lei zong in harsatnak tampi a um pinah cachimtu umnak ding inn sak zong kan lim rih lo. Sianginn herhhai zong tampi a um rih. Kan sin i min an pek ning in an rat khawh a si ahcun minung 500 hrawng an si lai caah bawmh kan herh ko,” tiah Saya Moses nih a chim.

Thawng dang relchap, sac raltuknak vanlawng kah ruangah tualchung mi 20 fai thi, adang 30 hrawng hliam tuar.  Biangreithlep 9, cawnnilini ah Magwe ramṭhen, Saw peng chung Akyi Pan Paloon khuate hrambunh phungki inn cu hriamtlai he kahdohnak zeihmanh a um lo lio ah raltuknak vanlawng hmangin rualchung mi tinhchih in a kah caah minung 20 hrawng thi, adang 30 hrawng hliam tuar. A thi mi ah kum tlinglo ngakchia zong an i tel, hliam tuar ah phungki zong an i tel fawn, tiah RFA nih chim.

Tualchung thawngzamh chimnak ah, hi phungki inn kahnak ah a hman mi bomb hi 500-lb bomb a si i, a tha ṭhawng ngaingai mi a si. Tualchung upa le rianṭuantu pawl lam le sul kong ceihkhannak le khuakhan lairelnak an ngeih lio hmuisel in a kah hna hi a si. Phungki inn zong bomb mei nih ciam viar a kangh. Minung 12 hrawng ut viar in a kanghchih hna. Atu tiang ruak 16 char an si, nain minung hliah khawh an si lo. Hi nakin a thi mi tam deuh rih khawh an si, tiah chimchap.