AA Nih Buthidaung Peng Cu A Ningpi In An Uk Cang Ee
Rakhine ramkulh, Buthidaung peng chung SAC ralkap sakhan le Byuha Headquarters vialte an laak dih i Buthidaung cu a ningpi in an uk cang kong, AA nih an thanh. Rakhine ramkulh, Buthidaung khuapi ah a um mi, a hnu bik a taang mi SAC ralkap Byuha Headquarters telh in Byuha kuttang Battalion sakhan, chaklei SAC ralkap, hriamnam phurtu Battalion le Dah-Kah-Sah(Sittwe) kuttang Buthidaung hrambunh Battalion sakhan vialte cu AA nih nihin May 18, chun suimilam 12:00 hrawng ah an laak dih, tiah theih a si.
AA nih Buthidaung um SAC ralkap Byuha Headquarters le Battalion sakhan vialte an laak hnu ah sakhan chuahtak in a zaam mi SAC ralkap le AA a dohtu Muslim hriamtlai pawl cu AA nih an dawi hna caah Buthidaung khuapi kiangkap ah kahdohnak a um rih, tiah theih a si. SAC ralkap le Muslim hriamtlai pawl a zaam mi an um caah Buthidaung khuapi kiangkap le khuate lei a um mi tualchung mi zong ralring tein ding ah AA nih thawng an thanh hna.
AA cu chaklei hriamtlai unau he ṭangṭi in 1027 Operation an kalpi chung ah Kyauktaw, Mrauk-U, Minbya, Rathedaung, Ponnagyun, Pauktaw, Myebon, Ramree, Chinram, Paletwa le nihin ah an laak chap mi Buthidaung tiin peng 10 an laak cang. Kahdohnak ah ralbawi telh in SAC ralkap a thong leng AA sin ah an i ap cang, tiah theih a si. thawng dang relchap, Chinram, Kanpetlet peng ah SAC ralkap nih an rak tlaih mi hna Chin ralzaam 38 cu an chanhchuah khawh hna kong Chin Defence Force – Kanpetlet nih an chim.
Kanpetlet peng, Kyindwe khuapi kahdohnak ah sakhan chuahtak in a zaam mi SAC ralkap nih a luancia May 14 ni ah Ung khua ralzaam 38 cu an rak tlaih hna. Cu tlaih a tong mi ralzaam 38 cu nizan May 17 ni ah an chanhchuah khawh hna kong Chin Defence Force – Kanpetlet in ṭuanvo ngei pakhat nih a chim.
A luancia May 14 ni ah SAC ralkap nih an tlaih mi hna ralzaam chung in nu 27, pa 11 an si i, cu chung ah kum tling lo ngakchia pahnih, tar pakhat le hawi lo lo mi pakhat an i tel, tiah theih a si. SAC ralkap nih an tlaih hna lio ah a zaam i a luat mi ralzaam 4 belte cu nihin tiang hmuh an si lo kong, ralzaam mi nih an chim.
