AA Ruangah Kan Unau Paletwa Lei Nunnak Liam Mi Tiang An Um Cang
Paletwa peng ah chungtlik zawtnak nih a tlunh hna i nunnak liam mi tiang an um, Chin ramkulh, Paletwa peng, Thanhtaung khua le a kiangkap khua 4 ah furpi ti thiang lo mi ruang ah chungtlik zawtnak a karh i nunnak liam mi zong an um, tiah tualchung mi hna sin in theih a si. “A luancia 2024, June 10 lio zong ah datsi phorh ding in a kal mi Thanhtaung khua mi pa 1 cu Ponechaungwa khua a phanh ah a chung nih tlik i sii-ai a um lo ruang ah a nunnak a liam” tiah tualchung mi pakhat nih a chim.
Cu pin ah Thanhtaung khua le a kiangkap khua hna ah furpi nikhua caan dinti thiang lo ruang le sii-ai um lo ruang ah chungtlik zawtnak a karh, tiah theih a si. “Furpi kan phan cang i ti a thian ti lo ruang ah chungtlik zawtnak a tam, Thanhtaung khua le a kiangkap khua hna cu Rakhine ralkap AA nih sii-ai phorh an kham i khuatlawng mi hna le thilphor motor pawl an chek tuk ruang ah sii-ai a um ti lo” tiah tualchung mi pakhat nih Kimo Media ah a chim. Thawng dag rel chap duh mi caah rel chap ding kan peh piak rel chap.
Chinland Cozah ralkap nih an laak mi Tongzaang khua, humhimnak gate ah CNA le ṭangṭi phu hna nih bingraang (Heroin) bawm thong khat an tlaih tiah Chin National Front (CNF) nih a thanh. Motor number YGN/4J-4438 in minung pahnih nih an phorh mi bingraang cu 2024 June 13 ah an tlaih mi a si i, India ram ah luhpi ding in an timh mi a si tiah theih a si. An tlaih mi bingraang cu bawmh thongkhat a si i.
India tangka sing 350 in 400 (35,000,000 – 40,000,000) kar man a si lai tiah ruahdamh a si. Bingraang phortu hna le an motor cu rithaisii lei tawlrel ningphung in dantatnak pek awk ah an hren chung hna i, anmah he aa pehtlai mi pawl zong hlathlai an si lai tiah theih a si. Tonzaang peng cu Chin ramkulh chung ah bing tam bik an cinnak hmun a si ti zong CNF nih a langhter.
