Aizawl Khuapi Um Chinmi Nih Tilim Operation 4 Ca Ah Tangka Rs 84,700 An Pek
Mizoram ramkulh, Aizawl khuapi ah a um mi Chinmi hna nih atu lio ah kalpi cuahmah mi Tilim Operation 4 ca ah tangka Rs 84,700 an pek, tiah theih a si. Aizawl khuapi i a um mi Chinmi hna nih Tilim Operation 4 ca ah tiin an thawhkhawm mi tangka Rs 84,700 cu Chinland Defense Force – Thantlang sin ah August 17 ni ah khan tlamtling tein an pek kong, Regional Committee of Mizoram Chin National Front in Chairman a ṭuan lio mi Pi Siangchin Cinzah nih The Chin Post ah a chim.
Atu tan i Tilim Operation 4 ca ah tangka tho mi hi Aizawl khuapi ah a um mi Chinmi nih kan pek mi a si. Chinmi kan ti tik ah zate in i khawlh awk a ṭhat lo caah minung thimhlei mi deuh lawng kan khawlh hna i Rs 84,700 a chuak kho. Aizawl khuapi chung i tangka van i khawlh zong hi a awl mi cu a si lo nain ram le miphun ca ah zaanghlei cawinak te he tangka thotu vialte an cung zong ah kan i lawm tuk hringhran,” tiah Regional Committee of Mizoram Chin National Front in Chairman a ṭuan lio mi Pi Siangchin Cinzah nih cun a chim.
Nikum 2023, December thla ah rak dirh mi Regional Committee of Mizoram Chin National Front nih tukum 2024, January – May thla tiang ah CNF/CNA cu Rs 400,000 an rak pek cang hna kong, ṭuanvo ngeitu sin in theih a si. Thawngdang: CDF-Matupi, battalion 2 ca ah future hope foundation nih uniform 100 leng an pek. Chinram, Matupi peng ah hrambunh mi CDF-Matupi, Battalion 2(Vakok Battalion) ralkap hna ca ah tiin ralkap uniform 100 leng cu Future Hope Foundation nih an bawmh hna, tiah theih a si.
CDF-Matupi, Battalion 2(Vakok Battalion) ralkap hna ca ah tiin pau dohthlennak ah zaanghlei cawi mi mizapi nih nan thawh mi tangka in atu bantukin Future Hope Foundation nih ralkap uniform 100 leng kan pek khawhnak a si,” tiah Future Hope Foundation nih an langhter. Pau dohthlennak ah a lam kip in a cawlcang i Future Hope Foundation sin ah tangka thazaang in si seh, eidin tirawl in si seh thazaang a chuah mi nulepa u le nau nan dihlak cung ah kan i lawm tuk hringhran,” tiah Future Hope Foundation nih an langhter chih.
