Breaking News: CNA Le Ṭangṭi Phu Hna Nih Tonzaang Khuapi An Phomh Cang

Chin ramkulh chaklei, Tonzaang khuapi um SAC ralhrang sakhan cu Chinland ralkap CNA hruai mi ṭangṭi phu hna nih nihin May 16 ah kahdoh hram an thawk cang, tiah Chinland ralkap in chimphuan nak nawlngeitu Salai Htet Ni nih a chim. Nihin 2024, May 16 zing ah Tonzaang khuapi um SAC ralhrang Khah-Lah-Yiah 269 battalion sakhan cu Ministry of Defense tang ah ummi Chinland ralkap hna nih kahdoh hram an thawk i SAC ralhrang nih raltuknak vanlawng in voi 3 tiang bomb a rak thlak, atu cu ZRA he an i kaap lo” tiah Salai Htet Ni nih a chim.

Kahdohnak ah SAC ralhrang nih raltuknak vanlawng in voi 3 tiang bomb a rak thlak nain Chinland ralkap ṭangṭi phu in nunnak liam mi le hliamtuar mi an um lo, mizapi nih rak kan telpi uh, tiah Salai Htet Ni nih a chim chap. A luancia May 11 ah Tonzaang peng Lungtak khua cu SAC ralhrang nih cunglei in voi 2 tiang bomb a thlak caah Khrihfa biakinn 2 le tualchung mi hna inn 5 zong a rawk i Lungtak khua le a kiangkap khua 5 in tualchung mi hna cu ral an hrial hna, tiah theih a si.

May thla thawk in Tonzaang khuapi um palik sakhan pawng ah a ummi tualchung mi hna cu kahdohnak kong an theih mi ruang ah ral an hrial hna, tiah theih a si. Thawng dangg rel chap, kinchaung khua ah SAC nih cunglei in bomb an thlak caah tualchung mi 4 nunnak liam, 7 leng nih hliamfak an tuar, Rakhine ramkulh, Maungdaw Peng, Kinchaung khua cu ruang um lo SAC ralhrang nih cunglei in bomb an thlakhnawh caah tualchung mi 4 an nunnak liam, midang 7 naak tlawmlo nih hliamfak an tuar, tiah tualchung Media nih Khit Thit Media ah an chim.

2024, May 14 zing suimilam 11:00 tluk ah SAC ralhrang nih Kinchaung khua cu ruang um lo cunglei in bomb an thlakhnawh hna caah tualchung mi 4 an nunnak a liam, midang 7 naak tlawmlo nih hliamfak an tuar, tiah theih a si. SAC ralhrang cunglei bomb thlakhnawh naak in Kinchaung khua chung um Phungki sianginn le a pawngkam tualchung mi khuasaknak inn zeimawzat a rawk chih tiah an langhter.

Maungdaw le Buthidaung hmunhma ah Arakan Army (AA) le SAC ralhrang karlak kahdohnak fak a chuak tawn i ralhrang nih a tu bantuk ruang um lo in tualchung mi umnak khuate hna hi hriamngan in an kah tawn, tiah tualchung mi nih an chim, crd- Lungmili Post.