Breaking News: Mindat Peng SAC Ralkap Sakhan Cu SAC Ralkap Nih An Chuahtak
Chinram, Mindat peng, Shweaungthar khua ah hrambunh mi SAC ralkap sakhan cu SAC ralkap nih an chuahtak i Tilin khuapi, Shweti Hall ah a um mi SAC ralkap, palik le Pyusawhti pawl sin ah an i fonh kong, Gangaw pengkomh Battalion(15/16/17), Yaw Revolution Army- Tilin nih nihin June 22 ah an thanh. Mindat- Tilin peng aa ritnak Shweaungthar khua ah a liamcia 2021 June thla in umhmun a rak khuar mi SAC ralkap pawl nih cun a luancia June 19 mi ah an sakhan cu an kangh i an chuahtak, tiah theih a si.
Shweaungthar khua SAC ralkap sakhan cu Tilin- Kyaukhtu-Mindat khuapi pehtlaihnak lampi cung ah a um mi a si i Chinram le Yaw chawlehnak lampi cu SAC ralkap nih uk dih an i timhnak kong ah a biapi ngai mi sakhan pakhat a si, tiah an chim. Chinram ah Chin hriamtlai phu nih khuapi chung kahdohnak an kalpi ruang ah Shweaungthar khua SAC ralkap ca ah a him ti lo tiin an chuahtaknak a si kho.
Tilin khuapi ah ralkap thazaang chap in, fekfuan deuh in kahdohnak ah timhcia in um duh ruang ah sakhan chuahtak in an i fohnak a si lai,” tiah Gangaw pengkomh Battalion(15/16/17), Yaw Revolution Army- Tilin in ṭuanvo ngeitu nih an chim. Thawng dang rel chap, Chinram, Tedim peng Kennedy SAC ralkap sakhan cu ZFU/PDF-Zoland nih a liamcia 2023 November 23 ah an rak laak nain a luancia June 18 ni ah khan SAC ralkap nih an laak ṭhan. ZFU/PDF Zoland nih an sungh mi Kennedy tlang sakhan cu.
Nihin June 22 zinglei suimilam 9:00 hrawng ah Chinland Council ralkap ṭangṭi phu nih an laak ṭhan kong le Taingen sakhan zong Chinland Council ralkap kut ah a um kong, CDF-Hualngoram Defence Director Pu Puite sin in kan theih. Tedim peng, Kennedy tlang sakhan cu Chinland Council ralkap ṭangṭi phu nih nihin June 22, zinglei suimilam 9:00 hrawng ah tlamtling tein an laak i sakhan ah thantar zong kan thlai cang, ṭangṭi phu nih hmunram thianhfelnak zong an tuah cuahmah.
a rauh hlan ah Video chuah khawh kan rak i zuam lai,” tiah Pu Puitea nih The Chin Post ah a chim. Nizan June 21 ah The Chin Post telh in Chin Media cheukhat nih “CNA ṭangṭi phu nih a luancia January 16 ni ah an rak laak mi Taingen sakhan cu SAC ralkap pawl nih an laak ṭhan cang” tiin kan ṭial mi kong he pehtlai in Pu Puitea nih cun, “Taingen sakhan hi SAC ralkap nih an la kho rih, Chinland Council ralkap kut chung ah a um rih ko. An laak cang ti mi thawngpang kha a dik lo mi a si.
SAC ralkap pawl hi Taingen thlacamnak tlang (Bethel) ah an um i kannih lei hi sakhan ah kan um, Drone zong in kan kah hna i atu tiang ah cun Taingen sakhan cu kan kut ah a um rih ko,” tiah a chim. Tedim-Kalay lampi kam i a um mi Keneddy tlang sakhan kahdohnak ah hin CNA, CDF-Hualngoram, PDA-Tedim, CDF/CDM-Siyin, PDF Kalay – SR6, CDF-KKG Battalion (7), CDF-Zanniatram le Chin hriamtlai phu dangdang an ṭangṭi hna, tiah theih a si.
