Breaking News: SAC Ralkap Nih Tonzaang Ah Helicopter In Ralkap Thazaang A Chap
Chinland Council ralkap hna kut chung ah Tonzaang khua a phak lo nakhnga SAC ralkap nih nihin May 20 ah Helicopter in ralkap thazaang tam nawn a chiah, tiah thawng kan theih. Tonzaang khuami pakhat nih, “SAC ralkap nih Tonzaang khua ah Helicopter pathum in ralkap tam nawn an rak chiah hna,” tiah Helicopter a ṭum lio video tawite he a langhter. May 16 ah Chinland Council ralkap hna nih Tonzaang khua cu doh hram an thawk i nizaan May 19 ah Tonzaang khuachung i palik sakhaan le ralkap sakhaan an laak khawh nain.
SAC ralkap pawl cu khuachung mipi inn ah hmunhma an laak rih caah pehzul in thianh an hau, tiah CNF/CNA chimnak nawlngei Salai Htet Ni nih Media hna sin ah a chim. Tonzaang peng chung ah a um mi Cikha khua tu cu nizaan May 19 ah Chinland Council ralkap hna nih tlamtling te in an laak khawh cang, tiah theih a si. Thawng dagn rel chap, Hakha, EPC sang ah mifir nih inn an bauh, phaisa mmk sing 400-500 fai an fir.
Nihzan 2024, May 19 (Zarhpini) ah Hakha, EPC sang ah a um mi Pu Ṭial Thang te inn cu mifir nih an i pumh kar ah innka an bauh i Kawlram phaisa sing 400-500 fai an firpiak hna tiah theih a si. “Mifir nih an bauh caan hi zinglei sml 10:00-12:00 karlak ah a si,” tiah inn neitu chungkhar nih an chim. “Tuthla chung ah Hakha khua ah misual nih inn bauh le thilfir a um kan thei lo.
Grace Baptist Church ah tuzing kan vai pum le inn kan lawi tik ah cun inn a rak i bauh cang. Kan thilri tampi an rak sual len. Atu tiang ah thil a tlau tiah kan i fianmi cu phaisa hi a si ko,” tiah inn neitu nih a chim. Pu Ṭial Thang te chung cu Senthang peng, Lungrang khuami an si. Hakha ah chungkhar he khua an saknak kum 17 tluk a si cang.
