Buainak A Um Lo Nakhnga Kan I Zuam Tiah CNF Nih An Chim
Chin hriamtlai phu pawl karlak ah kahdohnak lei he pehtlai in buainak a chuah sual nakhnga lo kan i zuam tiah CNF chimphuannak nawl a ngeitu Salai Htet Ni nih a chim. Chin Brotherhood chungtel a si mi MTC/MDF, ZFU/PDF-Zoland, CNO/CNDF, CNC/CDF-Mindat, CDF-Kanpetlet, CDF-Matupi Brigade 1 nih May 1 ah cathanh an chuah i CNF hruai mi Chinland Council chungtel hriamtlai pawl an cawl canghnak hmunhma ah buainak an karhter chin i phukhat le phukhat kar buainak le thichuahnak lei lam a zawh tiah an langhter.
Chin miphun phukhat le phukhat karlak kahdohnak hrial khawh nak caah Chin Brotherhood nih voi tampi ralrin pek ko bu ah hmaifon in cawlcangh a si ahcun Chin Brotherhood phu zapi bawm in kan in lehrulh hna lai tiah an thanh. Cu kong he pehtlai in CNF chimphuannak nawl a ngeitu Salai Htet Ni nih atu bantuk thil sining hi dothlennak ah a cang tawn mi thil a si tiah a chim. Chin hriamtlai phukhat le phukhat karlak ah kahdohnak lei buainak a chuah nakhnga lo cawlcangh mi a um maw tiah.
Salai Htet Ni an hal tik ah “Kan i zuam ko, SAC nih kan chunglei tein an kan merh lai zong kha ralrin a hau, atu zong mah le hmunhma cio daihnak caah ti in phukhat le phukhat kha pehtlaih aa zuam i a naih hna” tiah a chim. Chin Brotherhood phu nih Operation an tuah tik ah CNF/CNA he i bawm kho usih law a ṭha hnga tiah Salai Htet Ni nih a chim fawn. CNF entainak a fak mi Chin Brotherhood phu hi AA hawikomhnak a ngei mi phu an si. Cun MDF le CNA, CDF karlak ah kahdohnak a chuak pah tawn.
Thawng dag rel chap, thlakhat deng mipi sin in a tlau mi SAC hruaitu chang Lt. General Soe Win cu April 29 ah Mon ram, Mawlamyaing khua ralkap sizung ah aa thlop lio mi ralkap pawl a va ton hna tiah MWD nih a langhter. Chief of Defense in Lt. General Nyun Win Swe, Northeastern Commander le ralbawi ngan pawl nih Lt. General Soe Win cu an zulh. Lt. General Soe Win cu chun ah Mon ram le Karen ram i Minister pawl he zung kip upa pawl he Mawlamyaing ah tonnak an ngei hna.
Cun SAC hruaitu chang nih Northeastern Command in Commander pawl he tonnak an ngei i kahdohnak lei, ramri kong le himnak kong hna bia a rauh tak hna tiah SAC lei thawngzamh nih cun an langhter. Lt. General Soe Win hi April 3 ah an tuah mi Ba-Htoo khua ralkap cawnnak a dih puai ah a kai ve i cu hnu ah thlakhat deng a tlau hi a si.
Atu bantuk in caan saupi a tlau caah April 8 le April 9 ah Mon ram, Mawlamyaing hrambunh Northeastern Command ah Lt. General Soe Win a um ve lio ah Drone in bom an thlak hnawh hna i aa hliam mi a si kho tiah a ruahdamh mi an tampi.
