CDF-Hakha Nih An Chanhchuah Mi chung Ah Nun Chung Thongthlak Ding Le CDF Chungtel Hna An I Tel
CDF-Hakha nih thongtla an chanhchuah mi hna lak ah nun chung thongthlak ding le CDF chungtel hna zong an i tel. Chinram, Hakha khuapi um SAC ralhrang kuttang palik sakhan cu CDF-Hakha nih July 20 ni zinglei suimilam 5:00 tluk ah luhhnawh in an kahdoh i palik 3 an thih pin ah hriamthil tam ngai zong an laak chih khawh i SAC ralhrang nih nun chung thongthlak ding in bia an khiahpiak mi hna le CDF chungtel hna telh in thongtla mi nu 13 le pa 59 zong an chanhchuah khawh hna kong, CDF-Hakha President nih a chim.
Khuapi chung ah kahdohnak voi 100 leng kan tuah cang i SAC ralhrang pawl an thazaang kan derter hna lai. Cun, an thazaang a der deuh in Hakha khuapi kan laak lai. A hnu bik kan i timh mi cu Hakha khuapi laak kahdohnak kalpi a si. Palik sakhan laak zong hi kan i timh mi ah aa tel ve mi a si. Atu cu thongtla vialte an chuak kho cang i a himnak hmun an phan dih cang,” tiah CDF-Hakha President nih Khonumthung ah a chim.
Thongthla mi hna lak ah Nu Biak Mawi Sung cu CDF hna tangka na bawmhchanh hna tiin SAC ralhrang nih a liamcia 2023, September 29 ni ah nun chung thongthlak ding in bia an rak khiahpiak mi zong aa tel. Cu pin ah CDF-Hakha chungtel minung 8, CDF-Senthang chungtel minung 5, ramkhel kong he aa pehtlai mi minung 30 le thil dang ruang ah thongthlak mi minung 15 zong an i tel, tiah a chim chap.
Hakha khuapi laak khawhnak ding ah “Rung Operation” cu 2023, November thla in kalpi hram an thawk i kahdohnak caan chung ah SAC ralhrang lei 30 tluk le an lei ṭang mi minung 10 an fimtawl cang hna kong, CDF-Hakha President nihcun a chim. CDF-Hakha nih Hakha peng 70% cu a humhak cang i a taang rih mi 30% zong tlamtling tein a humhak khawh nakhnga “Rung Operation” cu pehzulh in an kalpi, tiah theih a si.
Thawng dang: Chinram thlanglei, Kanpetlet khuapi um SAC ralhrang kuttang palik sakhan in palik Sergeant Kui Ling cu a luancia 2024, July 18 ah hriamthil he kan sin ah a rak i fonh, tiah CDF-Kanpetlet nih nihin July 22 ah an thanh. CDF-Kanpetlet sin ah aa fonh mi palik Sergeant Kui Ling nih BA.63 zuun 1, kuanfang 30, kuanbawm 2 le ralkap phone 1 zong aa put chih, tiah theih a si. Kanpetlet pengchung ah a um mi SAC ralhrang le palik pawl nih hriamnam chiah in mizapi sin i fonh nan duh ahcun CDF-Kanpetlet sin ah pehtlaihnak nan kan tuah khawh, tiah CDF-Kanpetlet nih thawng an thanh mi ah an langhter chih.
