CDF-Hualngoram Nih Um Kalnak Kongah Thawng Thanhnak A Tuah

Theihternak tuah hmasa lo in security check gate ah ah hriamnam he luh a ngah lo tiah CDF-hualngoram nih thanh. Chinram, Hualngoram chung ah CDF-Hualngoram sin ah a hlankan in  theihternak tuah hmasa lo in le sianhnak um lo in Security Check Gate ah hriamnam he luh a ngah lo, tiah CDF-Hualngoram nih theihternak an tuah. “Hualngoram chung ah a um mi Security Check Gate kip ah zan suimilam 9:00 in zinglei suimilam 6:00 tiang ahohmanh nih Gate an lonh kho lo. Damlonak le zualral thil a um sual ahcun CDF-Hualngoram ṭuanvo ngeitu pehtlaih hmasa ding a si lai.

Hualngoram chung ah a lutchuak tawn mi motor cu Silpaulin khuh in kal a ngah lo. Khualtlawng a phur mi motor paoh nih Security Gate ah khualtlawng mi min cazin le NRC number ṭha tein pek dih ding a si lai,” tiah CDF-Hualngoram nih zapi sin ah cathanh in theihternak an tuah. “Security thil kong ah chekhlatnak tuah lio ah ṭuanvo ngeitu hna nawl ngai tein luhchuah ding a si lai. Theihternak le sianhnak tel lo in Security Check Gate ah hriamnam he luhchuah lo ding a si i.

CDF-Hualngoram nih ralrin peknak kan tuah mi ngai lo in nawl a zul lo mi paoh cu an cung i zei thil a tlun hmanh ah ṭuanvo kan la hna lai lo,” tiah Chinland Defense Force – Hualngoram nih an thanh mi ah an langhter.crd- The Chin Post. Thawng dang: Matupi khuapi kahdohnak ah a zaam mi sac ralkap 120 hrawng hriamnam he an tlaih hna kong cb nih an thanh. Chinram, Matupi khuapi kahdohnak ah a zaam mi SAC ralkap 120 hrawng cu hriamnam tam ngai he an tlaih hna kong le a zaam i a luat mi SAC ralkap pawl pehzulh in an fimhlawm hna kong.

Chin Brotherhood nih nihin July 28 ah cathanh an chuah. “A luancia June 29 ni ah khan Matupi khuapi ah a um mi Khah-Mah-Yah 304, Khah-Lah-Yah 140 le Byuha sakhan cu AA hruai mi CB ralkap nih an rak laak hnu ah a zaam mi SAC ralkap, an chungkhar pawl le zung rianṭuan 120 hrawng cu July 17 ni ah an hriamnam he kan rak tlaih hna. Cu bantuk ṭhiamṭhiam in July 25 ni ah a zaam mi SAC ralkap pawl he suimilam 2 chung hrawng kan i kah hnu ah.

SAC ralkap zeimawzat kan tlaih chap hna i a zaam mi cheukhat zong kan fimhlawm hna,” tiah Chin Brotherhood nih an thanh. “Kan tlaih mi hna SAC ralkap pawl le an chungkhar pawl cu eidin tirawl a ngei lo mi le i thlopbulnak sii-ai a ngei lo mi an si caah ṭha tein kan thlopbul hna i tirawl kan pek hna. Kahdohnak ah hliamfak tuar in a thi mi cheukhat zong an um. Kan tlaih mi hna hi phung he aa tlak ning in ṭha tein kan zohkhenh hna,” tiah Chin Brotherhood nih an langhter.