Chin Hriamtlai Ṭangṭi Phu Nih Tonzaang Khuapi An Laak

Chinram, Tonzaang khuapi cu nihin May 21 zing ah Chin hriamtlai ṭangṭi phu nih an laak i SAC ralkap hman mi hriamnam 50 leng an laak kong CNF/CNA in chimnak nawlngei Salai Htet Ni nih a chim. “Nihin zinglei ah Tonzaang khuapi cu a ningpi in an laak cang, SAC ralkap nih an hman mi hriamnam 50 hrawng zong an laak khawh, SAC ralkap cheukhat cu an zaam i hmunram thianhfelnak an tuah lio, atu cu Tonzaang khuapi cu SAC ralkap an um ti lonak hmun a si cang,” tiah CNF/CNA in chimnak nawlngei Salai Htet Ni nih cun a chim.

A luancia May 19 ni ah Chinram, Tonzaang peng, Cikha khuapi um SAC ralkap sakhan vialte an laak dih hnu ah khuapi a ningpi in CNA le CDF ṭangṭi phu nih an rak laak, nihin May 21 zinglei ah Tonzaang khuapi an laak ṭhan i Tonzaang peng a ningpi in Chin hriamtlai ṭangṭi phu nih an laak dih cang. A luancia May 15 ni ah thawk mi Tonzaang khuapi kahdohnak ah SAC ralkap thi le hliampu mi an tam i tlaih mi zong an um, cu kahdohnak ah cun.

SAC ralkap nih vanlawng in kahdohnak an tuah i bomb an thlak caah tualchung mi zong a himnak hmun kawl in ral an zaam, tiah theih a si. Nizan May 20, zanlei suimilam 5:30 hrawng ah khan CNA le CDF ṭangṭi phu nih Thantlang SAC ralkap sakhan cu hriamngan le tanglei in meithal he an kah hna, cu kahdohnak ah cun CDF-Thantlang in ralkap pakhat hliam fak tuk lo a tuar, SAC ralkap lei in thi le hliam an um le um lo kong fiang in theih a si rih lo kong CDF-Thantlang GS Salai Khamh Pek Lian nih The Chin Post ah a chim.

Thawng dang rel chap, KIA nih katsu sac sakhanpi telh in sakhan 4 an laak khawh chap, Kachin ramkulh, Waingmaw peng ah thazaang 200 tluk nih umhmun an khuarnak Katsu SAC ralhrang sakhanpi le Hkarshi khua um SAC ralhrang sakhan telh in ralhrang sakhan 4 cu nizan May 19 zan ah Kachin ralkap KIA hruai mi ṭangṭi phu hna nih an laak khawh chap, tiah KIA thawng laaknak hrampi nih a chim.

2024, May 18 thawk in an kahdoh mi Waingmaw peng, Myitkyina-Bhamo lamcung um Katsu khua SAC ralhrang sakhanpi cu nizan 2024, May 19 zan suimilam 8:00 tluk ah an laak khawh, mah sakhan ahcun SAC ralhrang 200 tluk an um i ralhrang lei thi mi an tam, cu hnu May 19 zan suimilam 11:00 tluk ah Waingmaw peng luhnak hmun um Hkarshi khua SAC ralhrang sakhan zong an laak chih khawh, tiah theih a si.

Katsu sakhanpi ahcun SAC ralhrang thazaang 200 hrawng an um, SAC ralhrang lei thi mi an tam. Mah hnu ah Hkarshi khua um SAC ralhrang sakhan zong May 19 zan suimilam 11:00 reng lo ah kan laak khawh, kahdohnak hi Waingmaw khuapi kiangkap tiang a phan” tiah KIA thawng laaknak hrampi nihcun a chim. Cu pin ah May 19 ṭhiam ah SAC ralhrang nih umhmun an khuarnak tlangcung sakhan 2 a si mi Byinpokaung sakhan le Laihpaung sakhan hna zong.

KIA hruai mi dohthlennak hriamtlai ṭangṭi phu hna nih an laak khawh chap i Shwenyaungpin khua um Khah-Mah-Yiah 321 SAC ralhrang sakhanpi cu laak ding in pehtlai in an kahdoh, tiah theih a si. “Nihin 2024, May 20 zing ah kahdohnak a faak ngai, SAC ralhrang nih vanlawng le hriamngan a hman tuk” tiah KIA thawng laaknak hrampi nih Khit Thit ah a chim chap. Kachin ramkulh ah May 7 in KIA le dohthlennak hriamtlai ṭangṭi phu hna nih kahdohnak an thawk i nihin May 20 tiang ah SAC ralhrang sakhan 100 leng an laak khawh cang, tiah theih a si.