Chin Ralzaam Nu Pakhat Nih Faphir 3 A Ngeih Lawmh Pi Cio Hna Usih
Dated Central Lairam Lawngtlai 2024 Biangreithlep 18 : 2024 Biangreithlep 17 zaanlei ah East Lairam in Mararam Siaha ah ralzaam in a rak phanmi Pi Nei Pha kum 29 nih Central Lairam Lawngtlai, Lairam Christian Medical Centre, ah hmunkhat te ah fathum phir hlai in a ngeih hna. Pi Nei Pha hi, East Lairam, Matupi peng Saphaw khua in Mararam Siaha ah ralzaam in umi an si. Fa kum 2 mi aa thlaih lio mi a si. 2024 Vaupi thla ah Siaha District Hospital ah i zohter in, nau pathum phir na pawi, tiah an chim i, Central Lairam Lawngtlai ah kuat a si.
Lawngtlai in ZMC ah kuat than ding a si. Asinain ZMC kalnak ding caah an harsat deuh caah Central Lairam Lairam Christian Medical Centre ah Dr. Bawi Cin Țial nih a zoh hnuah 2024 Biangreithlep 17 zaanlei suimilaam 6 ah i hlainak dal chung ah luhpi in Dr. B.Zonunsanga Sergion, Medical Superintendent LCMC le Dr Bawi Cin Țial nih suimilaam pakhat le cheu hrawng chung an tawlrel hnuah, nauthum phir cu tha te’n an ngeih ter khawh. Hi Nauthum phir hi nu lawngte an si.
Bawhte an chuah hmasabik mi hi Kg 2.500g a rit. A pahnihnak hi Kg 1.800g a si. A pathumnak hi Kg 2.450g a si. An dihlak in an ngandamnak zong a tha. Hringtu nu hi a thi a tlakcham deuh caah siibawi te nih thi laang 4 an pek i, a ngandamnak a hnorsuang lo. Pi Nei Pha konglam hi LCMC lei nih Doctors Without Borders sinah an theihter i, annih nih Pu Nei Pha le a fele rual sii-inn an um man hi an liampiak lai.
Thawng dang rel, Tamu pengkomh Chung Ah Umhmun Khuarmi Meitei Hriamtlai Phu P.L.A ralkap chungtel 40 tluk cu india assam rifles sin ah an i ap, 2024, May 16 ah Sagaing ramṭhen, Tamu Pengkomh chung um SAC ralhrang kuttang rianṭuan Meitei hriamtlai phu P.L.A ralkap 40 tluk cu India Assam Rifles sin ah an i ap tiah theih a si. Meitei hriamtlai phu P.L.A hna nih Kuki National Army KNA-B chungtel pakhat an kah thah hnu ah Kyunpin khua in ramri an tan i Saibol khua in India Assam Rifles sin ah an i ap, tiah ramri hngak tualchung mi hna nih an chim.
Meitei hriamtlai phu P.L.A kut chung in khua mi 2 zong tlamtling tein an luat i ralhrial hna umnak sakhan ah an um cang, tiah theih chih a si. SAC ralhrang kuttang rianṭuan Meitei hriamtlai phu P.L.A ralkap 40 tluk cu India ram Assam Rifles sin ah an i ap cang, khua chung ah a um rih mi midang hna zong India ram ah luh ve ding in timhlamhnak an ngei tiah an langhter. Meitei hriamtlai phu P.L.A hriamtlaiphu hna India ram, Manipur ah rak lut in Assam Rifles sin an i ap naak hi Prime Minister N Biren Singh nawlpeknak in a si, tiah an chim.
