Chinland Council Ralkap Ṭangṭi Phu Nih Matupi Khuapi Chung Kahdohnak An Kalpi Mi Ah Hnahnawhnak Pek Lo Ding In Nawlnak An Tuah
Chinram, Matupi khuapi chung penguk zung SAC ralkap sakhan cu Chinland Council ralkap ṭangṭi phu nih a luancia May 30 ni ah an laak hnu ah Matupi khuapi SAC ralkap Khah-Lah-Yah 140 sakhan le Byuha sakhan cu pehzulh in an kah ṭhan i kahdohnak an kalpi lio ah Rakhine ralkap AA hruai mi Chin Brotherhood ralkap nih Phaneng khua le Khah-Lah-Yah 140 SAC ralkap sakhan kar ah hnahnawhnak an pek hna ruang ah kaphnih kar kahdohnak a chuah kong Chinland Council nih nihin June 18 ah an thanh i atu i kahdohnak an kalpi cuahmah mi ah hnahnawhnak pek ti lo ding in Chinland Council nih cun ralrin peknak an tuah.
Chinland Council nih cun, “Chinland Council ralkap le ṭangṭi phu nih Matupi peng Khah-Lah-Yah 140 SAC ralkap sakhan le Byuha sakhan laak ding in a lam kip in kan i zuam cuahmah lio ah nizan June 17 ni ah Rakhine ralkap AA hruai mi Chin Brotherhood ralkap pawl nih Matupi khuapi chung i aa hreng mi tualchung mi hna ṭhialkam ding in ṭuanvo pek mi Chinland Council ralkap pakhat cu a ruang um lo in an tlaih pin ah kahdohnak kan kalpinak hmun Khah-Lah-Yah 140 SAC ralkap sakhan le Phaneng khua kar ah kahdohnak kalpi kho lo ding in hnahnawhnak a kan pek ruang ah kaphnih kar i kahdohnak tiang a chuak,” tiah an langhter.
Chinram luatnak ding ca ah thazaang chuah in kahdohnak a kalpitu Chinland Council, Chinland cozah Defence Ministry tang ah a um mi CDF-Matupi Brigade-2 telh in ṭangṭi phu nih kahdohnak a kalpinak hmun ah Rakhine ralkap AA hruai mi Chin Brotherhood ralkap nih hnahnawhnak kan pe ti hlah u law Chinland Council ralkap ṭangṭi phu nih Khah-Lah-Yah 140 SAC ralkap sakhan le Byuha sakhan cu a rannak in laak kan i zuam lai, tiah Chinland Council nih an thanh mi ah an langhter.
Hi kong ah hin AA hruai mi Chin Brotherhood ralkap nih cun, “Kan ralkap hna nih nunnak pek in le hliamtuar bu in Matupi khuapi chung Khah-Lah-Yah 140 SAC ralkap sakhan le Byuha sakhan pehzulh in kan kah lio ah CNF/CNA le a kuttang ralkap hna nih ruahlopi in an kan kah i atu ah cun SAC ralkap le CNF/CNA hruai mi ralkap karceh in kan um caah Chin Brotherhood le ṭangṭi phu nih kan kah ve hna,” tiah an langhter ve.
Thawng dagn rel chap, Matupi khuapi sac battalion 304 cu Chin Brotherhood (CB Operation) nih tlamtlingte in an laak, hriamnam tampi an laak chih 2024, June 17 ah Matupi khuapi SAC ralhrang umhmun khuarnak Khah-Mah-Yah 304 battalion cu Chin Brotherhood (CB Operation) nih tlamtling tein an laak khawh cang, tiah theih a s. Khah-Mah-Yah 304 hi Matupi khuapi in a san nakbik tlangcung ah umhmun khuarmi Sah-Kah-Sah battalion pakhat a si, tiah an langhter.
Chin unau hriamtlai ṭangṭi phu le SAC ralhrang karlak zarh hnih leng kahdohnak a rauh hnu ah SAC ralhrang umhmun khuarnak sakhan cu tlamtling tein an laak, tiah kan theih. Kahdohnak hmun ah SAC ralhrang thi le hliamtuar an um, mipi ralkap nih hriamnam zeimawzat an laak chih, tiah an langhter. Khah-Mah-Yah 304 hi Than Shwe chan lio ah Chin mi Khrihfa nih Vailamtah nganpi an rak phunnak hmun a si i SAC ralhrang nih Vailamtah rawk in umhmun khuarnak sakhan ah an hman mi a si.
