Chinland Council Ralkap Sin Ah SAC Ralkap Pakhat Le Palik Pakhat Hriamnam He An I Ap
Chinram, Thantlang khuapi chung ah a um mi SAC ralkap pakhat le palik pakhat cu pau dohthlennak ah i tel ve ding in an hriamnam he Chinland Council ralkap sin ah an i ap, tiah theih a si. Nihin July 25 ah Thantlang khuapi chung ah a um mi SAC ralkap pakhat le palik pakhat cu SAC kuttang ah rianṭuan duh ti lo in mipi dohthlennak ah i tel ve ding in MA-2 pakhat, G3 pakhat, Magazine 8, meithal kuan 185, Grenade pakhat, 40mm pahnih le kuankham pakhat i put in Chinland Council ralkap sin ah an i ap caah laksawng ah tangka Kyats sing 50 veve pek an si kong, Chinland Defense Force – Thantlang nih an thanh.
Atu bantuk in SAC kuttang ah rianṭuan duh lo in pau dothlennak ah aa tel mi cu lawmhpinak ah tangka Kyats sing 50 veve laksawng pek an si pin ah a himnak hmun an phak tiang ṭuanvo laak an si. Chinland cozah ralkap bu hruainak in Tilim Operation 4 cu kalpi cuahmah a si bantukin mipi dothlennak ah tel a duh mi ca paoh ah kutka kan hun peng i a himnak hmun an phak tiang ṭuanvo laak an si lai,” tiah Chinland Defense Force – Thantlang nih an thanh mi ah an langhter. Falam Khuapi Um Tualchung Mi Cheukhat Ral An Zaam Pah Cang Hna. Chinram, Falam khuapi ah a um mi tualchung mi cheukhat cu a himnak hmun kawl in ral an zaam pah cang hna, tiah theih a si.
July thla zarh hnihnak hrawng ah khan Falam khuapi chung ah kahdohnak kalpi an timh, tiin thawngpang a len hnu ah Falam khuapi ah a um mi tualchung mi cheukhat cu thilri timhcia in an um hna i atu ah cun a zaam mi zong an um pah cang hna. A zaam lo mi chungkhar zong thilri timhcia tein an um kong, Falam khuapi um tualchung mi nih an chim. “Falam khuapi ah hin kahdohnak an kalpi te ding cu a fiang pah ko nain hi kong ah hin tualchung hriamtlai phu lei nih thawng an thanh mi a um lo i khuanu khuapa zong nih thawng an thanh mi a um rih lo.
A cheu cu Yangon, Kalay lei ah a zaam cang mi zong an um, a cheu cu thawngpang a fian in Falam kiangkap khua lei ah dor aa tim mi zong an um hna. Zei kan ton lai hngalh a si lo caah ralring tein um a ṭha tiin thilri tete cu timhcia tein kan chiah dih ko, zingzan ei ding facang le mehhang tete zong kan i cawkcia ko. Thawng fiang theih a har caah hin laklawh ngaiin kan um cio i, thawng fiang hna kan theih cun kan zaam te ko hna lai,” tiah Falam khuapi ah a um mi tualchung mi pakhat nih The Chin Post ah a chim.
Falam khuapi um khuanu khuapa le a kiangkap khua 9 in minung 70 leng cu Nunphung Innpi ah tonbiaruahnak ngei in Falam khuapi boruak kong ceihmainak an rak ngei i Falam khuapi le a kiangkap khua paoh ralzaam lo ding in le mahle umnak inn cio ah um ding in lungtlinnak an ngeih kong, Falam Pawlpi, Falam Committee nih a luancia May 31 ah khan an rak thanh. Atu i Falam khuapi ah a cang cuahmah mi kong he pehtlai tu cun cathanh an chuah mi a um rih lo i Falam mipi sin ah thawng an thanh mi a um rih lo, tiah theih a si.crd- The Chin Post.
