Chinland Council Sin ah CDF-Tonzaang Kan Report Lai tiah PDA nih a Chim
Tonzaang peng chung ah CDF-Tonzaang nih nuhrin covo buarnak a tuahmi pawl cu Chinland Cozah sin ah kan report lai, tiah PDA-Tedim nih a chim. Chinland Council ralkap nih an rak laakmi Tonzaang khua ah miphun thleidannak, tlaihkhihnak, tangka in mi tlanhternak le inn kharpiaknak tibantuk cu CDF-Tonzaang nih a tuah, tiah PDA nih sual a phawt. Hi kong he pehtlai hin PDA Chiarman nih, “CC sin ah kaa in cun kan chim cang. Ca in report tuah kan timhmi ah dikthlir in thil sining kan ṭial. Kannih nih kan duhmi cu inn an kharpiak hna tik ah tehte tlamtling te he tuah hna seh.
ZRA dirkamhtu an si an ti ahcun tehte ṭha tein chuahpi i ning le cang te he dantatnak tuah hna seh ti hi kan duh,” tiah Khonumthung ah a chim. Tonzaang khua ah ZRA he aa pehtlaimi inn 18 hrawng kharpiak an si cang i, dantatnak tangka an liam lai i, CDF-Tonzaang sin ah an i fonh lawng ah an inn pek ṭhan an si lai, tiah CDF-Tonzaang ralbawizik nih a chim. CDF-Tonzaang ralbawizik Pu Than Suan Mung nih, “ZRA ruang ah CDF-Tonzaang ralkap pahnih an nunnak a liam i, tangka le chawva tampi kan sunghmi zong a um.
ZRA nih atu bantuk in nawlngeihnak a ngeih khawhmi hi an Supporter pawl ruang ah a si. Cucaah, kan sunghmi vialte hi anmah supporter pawl zong nih an liam sawk a si ve,” tiah a chim. Atu bantuk in ZRA chungtel pawl an inn kan kharpiakmi hna le kan tlaihmi hna hi hrem duh le thah duh ruang ah a si lo; lam dik lam hmaan ah karhlang ve hna sehlaw, kanmah he rianṭuan ṭi hna seh timi kan duh caah a si,” tiah Pu Than Suan Mung nih a chim chap. PDA-Tedim tu nih cun CDF-Tonzaang nih hin tlaihkhihnak le inn kharpiaknak a tuah tik ah miphun thleidannak um lo in le tehte fek ngeih bu te in ṭuanhma la seh ti a duhnak kong a langhter.
Rel chap: Lailenpi Ukhruaitu Committee Kan Ser Lai Tiah MDF nih a Thanh. Matupi peng, Lailenpi khua ah mizapi ukhruaitu bu “Lailenpi Ukhruaitu Committee” kan ser lai, tiah Chin Brohterhood chungtel Maraland Defense Force (MDF) nih nizaan July 22 ah thawngthanhnak a tuah. Laipenpi khua cu July 16 thawk in tlamtling tein MDF nih kan control cang an ti i, Chinland Council chungtel ralkap pawl nih an tarhmi bomb rap pawl thianhhlimhnak kan tuah cuahmah, tiah an langhter.
Lailenpi khua cu CNA le CDFs nih 2023 November 24 ah SAC ralkap kut in an rak laakmi a si nain AA hruaimi MDF nih atu July thla chung ah CDF-Mara le CNA kut in an chuh ṭhan hna. Atu bantuk in Chinram chung ah AA i hruai in hmunram i chuhnak a hun chuah caah SAC ralkap an um ti lonak Hualngoram zong ah mizapi thinphannak a chuak. Cucaah, Hualngoram Administrative Board (HAB) nih, “Mizapi thinphan lo ding in le atu bantuk in hmunram chuh ding in luh hnawhnak a um ahcun mizapi he i bawm in mipi nunhimnak kan kilkawi lai,” tiah cathanh an chuah ve.
