CNA Le Ṭangṭi Phu Hna Nih India Tangka Sing 400 Hrawng Man Bingraang An Tlaih
Chinland Cozah ralkap nih an laak mi Tongzaang khua, humhimnak gate ah CNA le ṭangṭi phu hna nih bingraang (Heroin) bawm thong khat an tlaih tiah Chin National Front (CNF) nih a thanh. Motor number YGN/4J-4438 in minung pahnih nih an phorh mi bingraang cu 2024 June 13 ah an tlaih mi a si i, India ram ah luhpi ding in an timh mi a si tiah theih a si. An tlaih mi bingraang cu bawmh thongkhat a si i, India tangka sing 350 in 400 (35,000,000 – 40,000,000) kar man a si lai tiah ruahdamh a si.
Bingraang phortu hna le an motor cu rithaisii lei tawlrel ningphung in dantatnak pek awk ah an hren chung hna i, anmah he aa pehtlai mi pawl zong hlathlai an si lai tiah theih a si. Tonzaang peng cu Chin ramkulh chung ah bing tam bik an cinnak hmun a si ti zong CNF nih a langhter. Thawng dang rel chap, AA hruainak in chin brotherhood nih matupi khuapi an luhhnawh i palik sakhan le penguk zung an laak khawh, Chin ramkulh thlanglei, Matupi khuapi cu.
Rakhine ralkap AA hruainak in Chin Brotherhood le Yaw Army (YA) nih an kahdoh i palik sakhan le penguk zung cu an laak khawh cang kong, theih a si. Chin Brotherhood zong nih “2024, June 9 thawk in Chinram, Matupi khuapi um SAC ralhrang sakhan pawl kahdohnak cu Chin Brotherhood, Yaw Army(YA) le a dang hriamtlai ṭangṭi phu hna nih kan kalpi i atu tiang kap 2 kar kahdohnak pehtlai in a faak” tiah June 13 ah an thanh.
Kahdohnak an kalpi ni thawk in a ni 5nak June 13 ah Matupi khuapi um palik sakhan le penguk zung cu AA, Chin Brotherhood le Yaw Army(YA) nih an laak khawh tiin kan theih, kahdohnak an kalpi ni thawk in SAC ralhrang nih vanlawng in bomb a rak thlak lengmang” tiah Matupi thawng laaknak hrampi pakhat nih a chim.
Kahdohnak caan chung ah Chin Brotherhood chungtel CDF-Matupi ralkap 1 nunnak a liam, tiah The Matupi Times nih a langhter ve. Matupi khuapi um tualchung mi hna cu an dihlak nawn in kahdohnak an kalpi hlan ah a himnak hmun kawl in ral an hrial hna, tiah theih a si.
