CNDF Chungtel Sin In CNA Ṭangṭi Phu Nih Rithaisii An Tlaih Tiah Thei Si
Chinram, Hualngoram chung, India—Myanmar ramri Checkgate ah pa pahnih nih an phurh mi rithaisii cu a luancia July 16 ni ah khan CNA le Hualngoram palik nih an tlaih. Rithaisii a phurtu hi CNDF chungtel an si, tiah kan thawng laaknak nih nihin July 18 ah an chim. CNA le Hualngoram palik nih Lalhminga(kum 34) kut ah hin rithaisii bawm 76, India tangka Rs. 520,000 le phone pakhat an tlaih. Cun, Biak Nei Thang(kum 33) kut ah rithaisii fun lian 4, fun fa mi 200 le phone pakhat an tlaih ve, tiah theih a si.
Hi kong he pehtlai in CNO/CNDF nih cun cathanh an chuah colh ve i, “CNO/CNDF cu rithaisii kong ah a thianghlim mi a si i rithaisii phurh a doh mi a si. Mihrokhrol cheukhat nih CNO/CNDF min zuar in a dik lo mi thawng an thanh i thangchiatnak kawl in kan limhang zorter an i zuam. CNO/CNDF nih thawng thanhnak kan tuah lo mi thawngpang a leng mi paoh cu mizapi nih rak zum hlah u,” tiah nihin July 18 ah an langhter.
Thawng dang rel chap, Mindat Peng ah SAC ralkap vanlawng bomb thlaknak in tualchung mi pakhat thi, Chinram, Mindat peng, Circle-12 hmunram khuate pakhat ah SAC ralkap nih nizan July 17, zanlai suimilam 12:19 ah SAC ralkap nih vanlawng in bomb an thlak ruang ah tualchung mi pakhat a nunnak a liam i minung pakhat hliam a tuar, tiah CDF-Mindat nih nihin July 18 ah an thanh.
Nizan July 17, zanṭim vanlawng bomb thlaknak ruang ah cun tualchung mi thi le hliam an um pin ah phungki sianginn pakhat zong a rawk. Mindat khuapi le a pawngkam hrawng ah SAC ralkap nih zanfatin in 120mm hriamngan an kah peng, tiah Mindat tualchung mi nih an chim.
A luancia July 10, zinglei suimilam 10:30 ah SAC ralkap nih Mindat khuapi chung ah a ruang um lo in kahdohnak an tuah i 120mm hriamngan an kah ruang ah ralzaam buuk cheukhat a rak rawk. April thla chung zong ah khan SAC ralkap vanlawng kahdohnak ruang ah Mindat peng ah tualchung hriamtlai phu in ralkap pahnih le tualchung mi 3 nunnak a liam i minung 30 hrawng hliam an rak tuar.
