CNF/CNA Le ZRO/ZRA Cu Tlamtling Tein Tonbiaruahnak An Ngei Kho
Zo Re-Unification Organisation (ZORO) tawlrelpinak in CNF/CNA le ZRO/ZRA hruaitu pawl cu nihin July 27 ah tlamtling tein tonbiaruahnak an ngei kho, tiah theih a si. Nihin July 27, chun suimilam 12:00 in zanlei suimilam 3:00 tiang Lalmuanpuia Punte, ZORO Vice President & Adviser to CM (Political) khaan chung ah ZRO/ZRA hruaitu le CNF/CNA hruaitu pawl cu tonbiaruahnak an ngei i kaphnih i hmuhthiam lo mi kong ah remdaihnak ser ding in hmailei ah tonbiaruahnak ngeih ṭhan an i timh kong, CNF Vice Chairman-1 Pu Thang Ning Kee nih a chim.
Nihin i tonbiaruahnak kan ngeih mi cu a tlamtling ngai ko. ZRO/ZRA le CNF/CNA palai lawng si lo in ZORO hruaitu zong nih an kan telpi khawh. CNF/CNA lei in minung 8 kan i tel kho, ZRO/ZRA lei in minung 5 an i tel kho ve, ZORO hruaitu zeimawzat nih an kan telpi fawn. Nihin i kan biaruahnak ah hin kaphnih kahdaih hnatlaknak le rianṭuanṭinak kong tibantuk cu kan i ceih rih lo. Hmailei tu ah tonbiaruahnak ngeih ṭhan lengmang ding in kaphnih in kan lung a tling i kaphnih kar ah remdaihnak a len i hmailei ah rian kan ṭuanṭi khawh nakhnga tonbiaruahnak ngeih lengmang tu kan i tim,” tiah CNF Vice Chairman-1 Pu Thang Ning Kee nih The Chin Post ah a chim.
Chin ralkap CNA le ZRA cu kaphnih kar i hmuhthiam lonak ruang ah an i kap tawn i kaphnih in thi le hliam zong an um tawn caah atu bantukin ZORO tawlrelpinak in tlamtling tein tonbiaruahnak an ngei kho i remhdaihnak ser ding in hmailei ah i tong lengmang ding in kaphnih in lungtlinnak an ngei. Thawng dang: Chin ramkulh,thlanglei Kanpetlet peng chung ah Arakan Army ruangah Kanpetlet peng chungum miphun tengnge pakhat le khat kar buaibainak a chuah sual si cun Kanpetlet mizapi nawl tel lo in Arakan Army – AA ralkap pawl kan ram ah a rak luh pi tu minung 5 nih an tefa chan tiangin ttuanvo an laak lai tiah Kanpetlet mizapi nih cathanh an chuah.
Mizapi nawl tel loin Arkan Army – AA pawl Kanpetlet ram ah a luh pi tu hna cu (1) Pu Htun Lin Thang (2) Pu Mana Naing (3) Pu Than Shwe (4) Pu Htun Hung le (5) Pu Thang Naing hna an si hna. Arakan Army – AA ralkap hna Kanpetlet peng chung an rak luh sin in khuate cheukhat ah hramhram in ralkap tlaak ter nak,hramhram in phaisa khawl nak te hna a chuak i a tu lio boruak he pehtlai in hmailei ah buaibainak a chuah sual si cun a cunglei minung 5 nih tuanvo an laak hrim hrim lai caah buaibainak a chuah hlan te ah an chung le zong nih chimhhrin in lai nan rel pi hna nak lai kan in nawl hna tiah an langhter.
Kanpetlet miphun hna cu chan khat hnu chan khat ah zei bantuk miphun tengnge he hman buaibainak,i ral nak kan ngeih bal lo bantuk in zei bantuk miphun hmanh kan va zawmhtaih hna lo bantuk in zei miphun hmanh nih a kan namnet ve lo i zalong tein khua a rak sa mi kan si bantuk in hmailei zong ah cubantuk thiam thiam in khuasak kan duh caah a tu bantuk cathanh kan chuah hi a si tiah an langhter chih.
