Congratulations: Club Minthang Juventus Nih Chin Ngakchia Joseph Mara Laichhie An Laak
Australia ram ah a phan mi Myanmar ram chuak Chin ngakchia Joseph Mara Laichhie(kum 12) cu Italy ram champion tiah hngalh mi, Serie A club minthang Juventus Football Club nih Acedamy team ah chuih ding in an auh, tiah theih a si. Joseph Mara Laichhie i a nu le pa Pu Rung Ceu Khaimeichho le Pi Toklengtiang cu Chinram, Thantlang peng, Ngaphaipi khua an si, Joseph Mara Laichhie cu atu lio ah Australia ram Youth Acedamy ah a chuih lio mi a si i, Italy hrambunh Juventus Football Club Youth Acedamy ah a ralai mi 2024–2025 season thar cun a chuih kho cang lai, tiah theih a si.
Joseph Mara Laichhie cu a chuihnak ding Juventus Football Club, Acedamy team i a pahrang chuah in a ke a kai ngai ahcun a chuih ning zoh in dot khat hnu dot khat kaiter in an chuihter te lai. Juventus Football Club cu kum 127 upa a si i Italy Serie A ah voi tam bik a champion mi Club an si.crd- The Chin Post. Thawng dang: Falam Khuapi Bank Ah Tangka Chuah Mi An Tam I Ri An Khiahpiak Hna. Chinram, Falam khuapi chung ah kahdohnak a fak lai ti a phang mi an tam i Bank ah tangka chiah mi aa chuahcia mi an tam caah rihkhiahpiak an si i sing 10 nak tam chuah a ngah lo kong, tualchung mi nih an chim.
A luancia zarh hrawng in Falam khuapi um KBZ Bank le Myanmar Economic Bank ah nichiarte ti awk in tangka chuah mi an tam i voi khat chuah ah sing 10 lawng an chuahpiak hna, ni thum chung hrawng cu duh zat paoh an chuahpiak hna nain hnu deuh cun sing 10 nak tam an chuahpiak ti hna lo, zarh khat hrawng aa duh ah Bank cauk chiah hmasa a hau i an chuah hna ni he cun zarh hnih hngah a hau” tiah tualchung mi pakhat nih a chim. A luancia May thla dih lei sang ah Chinram chaklei, Tonzaang le Cikha khuapi hna cu Chin ralkap ṭangṭi phu nih an laak hnu in.
Tedim khuapi zong ah Chin hriamtlai phu unau le SAC ralkap kar kahdohnak pehtlai in a fah caah Falam khuapi zong ah kahdohnak a fak kho mi a si, ti phan ruang ah tangka i chuahcia in hmun dang ah aa ṭhial mi an tam ngai cang, tiah theih a si. A luancia May 31 ni ah khan Nunphung Innpi ah Falam khuapi um khuanu khuapa le a kiangkap khua 9 in minung 70 leng cu tonbiaruahnak ngei in Falam khuapi boruak kong ceihmainak an ngei i Falam khuapi le a kiangkap khua paoh ralzaam lo ding in le mahle umnak inn cio ah um cio ding in lungtlinnak an ngeih kong, Falam Pawlpi, Falam Committee nih an rak thanh.
