Cunglei Bomb Thlak Nak In Mipi 360 Tluk Nunnak A Liam

2024, January thawk in April thla tiang, thla 4 chung Myanmar ram ah SAC ralhrang nih cunglei kahdohnak a tuah mi ruang ah tualchung mi 359 nunnak a liam i minung 756 nih hliam an tuar, tiah Nyan Alin Thit Research phu nih 2024, May 22 ah phungning tein an thanh. “Hi thla 4 chung ah SAC ralhrang nih cunglei kahdohnak voi 819 a tuah i buaktlak in nikhat ah voi 6 tiang cunglei kahdohnak a tuah” tiah a chim.

Cunglei kahdohnak a tuah tam biknak hmun cu Rakhine ramkulh le Sagaing ramṭhen ah a si i Myanmar ramchung um biaknak lei inn, sianginn le sii-khan 99 a rawk, tiah Nyan Alin Thit Research phu nih an langhter chih. “SAC ralhrang nih cunglei kahdohnak a tuah tam bik kum cu 2024 ahhin a si i tualchung mi nunnak liam mi le hliam a tuar mi zong an karh” tiah a chim chap. A luancia April 20 ah Karenni ramkulh, Loikaw peng, Konethar khua cu SAC ralhrang nih cunglei kahdohnak a tuah ruang ah ngakchia 2 telh in tualchung mi 6 nunnak a liam.

Cu pin ah March 31 zong ah Karen ramkulh, Hpapon khuapi, No.2 sang um phungki sianginn cu SAC ralhrang nih cunglei in kahdohnak a tuah caah phungki 1 telh in tualchung mi 8 nunnak a liam, tiah theih a si. Atu bantuk in SAC ralhrang nih cunglei kahdohnak a tuah mi ruang ah sualnak ngei lo tualchung mi hna cu a bu in an thi i atu May thla chung zong ah SAC ralhrang nih cunglei kahdohnak a tuah mi ruang ah tualchung mi a bu in nunnak liam mi an um, tiah theih chih a si.

Thawng dagg rel chap, Tonzaang khuapi cu chinland ralkap hna nih an humhak cang, SAC Le ZRA 40 tluk an tlaih hna  Chinramkulh, Tonzaang khuapi ah SAC ralhrang pawl an um ti lo (an thiang cang) i Chinland ralkap CNA le ṭangṭi phu hna nih an humhak cang, tiah Chinland ralkap CNF/A in chimphuannak nawlngeitu Salai Htet Ni nih nihin May 24 ah a chim. Nizan 2024, May 23, zanlei suimilam 4:30 tluk ah SAC ralhrang pawl hnulei an pil i khuapi laak kahdohnak ni 9 a rauh hnu ah Tonzaang khuapi dihlak cu kan humhak khawh cang, tiah a chim.

Tonzaang khuapi ah SAC ralhrang pakhat hmanh an um ti lo, ral bawmtu an rak thlah mi pawl zong Tedim khuapi lei ah hnulei an pil dih” tiah CNF/A in chimphuannak nawlngeitu Salai Htet Ni nih a chim. Tonzaang khuapi chung hmun cheukhat ah SAC ralhrang pawl nih bomb tam ngai an hmanh caah atu hi thianhlimnak an tuah lio, tiah theih a si. Khuapi laak kahdohnak cu May 15 in Chinland ralkap hna le ṭangṭi phu hna nih an thawk i May 19 ah Cikha khuapi cu an laak khawh, cu hnu May 21 ah Tonzaang khuapi zong an laak khawh.

SAC ralhrang nih Tonzaang khuapi cu laak ṭhan a timh caah helicopter 4 in thazaang a chap i kahdohnak a fah hnu May 23 ah SAC ralhrang pawl cu hnulei an pil ṭhan, tiah theih a si. Tonzaang khuapi laak kahdohnak ah SAC ralhrang thi mi le hliam pu mi an tam pin ah SAC ralhrang le ZRA 40 tluk an tlaih hna i SAC ralhrang sin in meithal zuun 100 leng le tangka sing 3,000 reng lo zong Chinland ralkap CNA le ṭangṭi phu hna nih an laak chih khawh” tiah CNF/A in chimphuannak nawlngeitu Salai Htet Ni nih a chim chap.

Thawng dang relchap, MTC/MDF Le IMC/CDF-Mara cu i fonh dingin lungtlinnak an ngei cang, Maraland Territorial Council/Maraland Defense Force (MTC/MDF) le Interim Maraland Council/CDF-Mara cu May 22-23, 2024 tiang, nihnih chung Mizoram, Siaha pengkomh Zawngling khua ah tonnak an ngei i hmunkhat ah i fonh dingin lungtlinnak an ngei kho cang tiah ṭuanvo ngeitu pakhat nih The Chin Post ah a chim.

Zawngling khua tonnak ah kaphnih in palai 7 veve an i tel kho. Tonnak dingah a tlangtlatu hi Mara Evangelical Church (MEC) hruaitu hna an si. Phuhnih i fonh ding a si caah phunglam thar ser a hau i hruaitu zong i thim a hau. Cun phu min zong a thar maw an hman lai, a hman cia mi pakhat khat dah an rinh lai ti a fiang rih lo. I fonh dingin lungtlinnak cu an ngei cang ko nain zeitikah dah an i fonh khawh lai ti a fiang rih lo.

Unau kan si ko nain caankarlak chung kan i hmuhthiam lo nak vialte hnuchit in atu bantuk in i fonh dingah lungtlinnak an ngeih khawh mi cu lunglawmh awk ngaingai a si. An biachah ningin i fonh kho zau ko hna seh law kan dohthlennak zong thazang a ṭhawng deuh hrim lai” tiah Chinland Council upa pakhat nih The Chin Post ah a chim.