Falam Khuapi Chung Kahdohnak Thawng
Nizan May 23, zanlei suimilam 3:00 hrawng ah Falam khuapi chung Construction zung pawng ah a um mi SAC ralkap pawl cu CNDF nih va fuh in an kah hna i SAC ralkap pakhat a liang ah an hliamh, tiah kan thawnglaknak nih a chim. Hi kong he pehtlai in CNDF chimnak nawlngei AGS-1 Salai Timmy Htut nih cun, “Falam khuapi chung kahdohnak hi a dik mi a si ko, atu hrawng cu hi bantuk tete a cang pah lengmang,” tiah The Chin Post ah a chim. Cun, Falam khuapi um tualchung mi pakhat nih, “Atu hrawng cu kahdohnak tete a um pah.
SAC raltuknak vanlawng(Jet Fighter) zong nih atu le atu in a kan hel i, chun he zan he a kan hel ko, nihin zong zanlei sml 4:00 hnu hmanh ah voi hnih a ra cang, a luancia May 22, zan suimilam 10:00 tiang ah voi 5 hrawng a rak kan hel,” tiah a chim ve. A luancia May 13 ni zong ah Falam khuapi chung ah bomb hmanh ding in a kal mi SAC ralkap le CNDF kar kahdohnak ah SAC ralkap pakhat a thi. Cu bantuk ṭhiamṭhiam in a liamcia.
2023 December 18 ni ah CNDF ralkap nih Falam khuapi chung ah SAC ralkap pakhat an rak fimhlawm, tiah theih a si. Thawng dang relchap, Chinram chaklei, Tonzaang khua ah SAC ralkap an um ti kong Chin National Front/Army (CNF/A) Chimnak nawlngei Salai Htet Ni nih a chim. Nizaan May 23 zanlei suimilam 4:30 in SAC ralkap pawl cu hnu an kir i kahdohnak ni 9 hnu ah Tonzaang khuapi ah SAC ralkap pakhat hmanh an um ti lo.
Tonzaang khua cu a dihlak in an laak i Chin ralkap hna kut ah a um cang, tiah Salai Htet Ni nih Vaurawng biaruahnak ah a chim. Tonzaang khuapi laak Operation cu Chinland cozah, Defense Ministry nih a voikhatnak Operation an tuah mi a si i May 15 in SAC sakhan pawl cu kah hram rak thawk in May 19 ah Cikha khua an laak khawh. May 21 ah Tonzaang khuapi SAC sakhan cu an rak lak khawh ṭhan.
SAC nih Tonzaang khua an sungh lo nak ding ah cunglei in voili tiang ralkap thazaang an chap pinah vanlawng in an bawmh peng hna nain Chinland ralkap hna nih ngol loin an kah peng hna caah nizaan zanlei ah khan hnu an kir. Tonzaang khua kahdohnak ah hin SAC sinin tangka Kyats sing thongthum hrawng an laak pinah hriamnam tampi zong an laak, tiah theih a si. Thawng dag rel chap duh mi caah rel chap ding thawng dang kan peh piak hna rel chap, bay of bengal rili in thlichia aa ser caah chinram le hmun dang ah ruah a fak kho.
Bay of Bengal in aa ser mi thli cu suimilam 24 chung ah thlichia ah i cang in Chinram le Myanmar ram hmun dangdang ah thli le ruah a fak kho, tiah khuacaan tuaknak zung nih an thanh. Bay of Bengal in a chuak mi thlichia ruangah hin May 23 – 27 chung ah ruah fak in a sur kho, tiah an langhter.
Chinram pinah Naypyidaw, Sagaing ramṭhen, Mandalay ramṭhen, Magwe ramṭhen, Bago ramṭhen, Yangon ramṭhen, Ayeyarwaddy ramṭhen, Tanintharyi ramṭhen, Rakhine ramkulh, Karen ramkulh le Mon ramkulh hna ah ruah hi a fak lai, tiah zumh a si. mRuahti a tam khawh caah tivate zong an lian kho i khuachung ah tilian zong a chuak kho, cucaah ralring tein um cio ding in khuacaan tahnak zung nih ralrin peknak an tuah.
