Hakha University Tel in Myanmar Ramchung University 23 SAC nih Hon a Timh
SAC nih Myanmar ramchung University 23 hon ding in timhtuahnak a ngei i cu chung ah cun Hakha University zong aa tel ve, tiah thawng kan theih. University kai nakding Application Form cu August 26 in September 12 tiang laak khawh a si lai, tiah SAC nih August 18 ah thawngthanhnak a tuah. SAC nih Hakha University hon an timh vemi kong he pehtlai in khuami cheukhat nih cun Hakha khua kiangkap ah kahdohnak a um tawn caah a tlamtling kho lai lo tiah ruahnak an ngei.
CDF-Hakha zong nih August 20 thawk in Thantlang lam i Hakha University lampial in Hakha University karlak ahohmanh kal lo ding le a kalmi cu ralhrang ralkap an si tiah ruah an si lai, tiah August 19 ah thawngthanhnak a rak tuah. Thawng dang rel chap, Mandalay ah ngunkhuai zung, penguk zung, meithat zung telh in zungkip cozah rianṭuan Non-CDM pawl cu ralkap training an kai kong theih a si.
2024, August thla thawk in SAC uknak tang ah um mi vuanci zung pawl nih an thim mi hna Non-CDM cheukhat pawl cu Pyusawhti ralhrang he hmunkhat ah ralkap training an kai kong le Non-CDM pawl a dang tein kai ter lo in Pyusawhti pawl he an fonh hna kong training kai mi cheukhat nih Khit Thit Meida ah an chim. “Cozah rianṭuan Non-CDM pa pawl cu a phuphu in an ṭhen hna i ralkap training an kai ter hna.
An dih in an zung cio ah an kir kho ti lai maw ti zong theih khawh a si rih lo,” tiah Mandalay ah ralkap training kai mi cozah rianṭuan pakhat nih a chim. Cu pinah Mandalay khuapi chung zong ah Mino hna cu thla fatin tuah mi ralkap traning ah hramhram in kaiter an si i Mandalay ramṭhen chung um khuate le khuapi sang cheukhat ah kum upa le ngakchia thleidang lo in ralkap traning an kaiter hna, tiah theih a si.
Kum 35 tang an si ahcun thla fatin ralkap training nan kai lai an ti hna. Kum 36 in 60 kar pa paoh cu Pyitusit training nan kai lai tiin zulhphung an serpiak hna” tiah Pyigyitagon peng tualchung mi pakhat nih a chim ve. Atu lio cu Myanmar ram chung hmun kip ah SAC ralhrang nih SAC luh ding ah mi an khawmhsuat ngai, tiah theih a si.
