Hlasak Thiam Salai David Lai Cu Nupi A Ngei Cang

Chin pa hlasak thiam Salai David Lai cu Norway ram ah khuasa mi a dawt mi nu he nihin July 6 ah Thailand ram, Bangkok khuapi ah ṭhitumnak an tuah cang, tiah theih a si. Thawng dang: Matupi Peng Tualchung Mi 1 Cu AA Hmanh Mi Bomb Lamhsualnak In A Nunnak Liam, AA Nih Pa 2 An Tlaih Hna. Chinram tlanglei, Matupi peng, Kola khua mi 1 cu nihin 2024, July 6 ah Rakhine ralkap AA nih an hmanh mi bomb aa lamhsual caah a nunnak a liam, tiah tualchung mi hna sin in kan theih.

Cu pin ah Matupi peng chung ah rallam sial mi Rakhine ralkap AA nih Kola khua mi pa 2 cu an tlaih hna pin ah Valangte khua zong an luhhnawh i tualchung mi hna tangka le an thilri pawl an firpiak hna, tiah theih a si. Nihin July 6 chun ah Matupi peng chung ah rallam sial mi Rakhine ralkap AA nih an hmanh mi bomb lamhsualnak in Kola khua mi pa 1 nunnak a liam, AA nih Kola khua mi pa 2 zong an tlaih hna i an kalpi hna” tiah Matupi peng thawng laaknak hrampi nih Lungmili Post ah a chim.

Cu pin ah AA nih Matupi peng, Valangte khua zong an luhhnawh i tualchung mi hna inn bauh in an tangka le thilri pawl zong an firpiak hna, tiah a chim chap. Matupi-Paletwa lamcung um Matupi peng, Valangte khua, Kola khua le Leisin khua hna cu rallam sial mi AA nih an luhhnawh caah tualchung mi hna cu a himnak hmun kawl in ral an hrial hna, tiah theih a si. Nizan July 5 ah Matupi peng chung ah rallam sial mi Rakhine ralkap AA pawl cu Chinland Council ralkap hna nih an kah hna i 7nak tlawm lo an thih pin ah hliam a pu mi zong an tam ngai. Chinland Council ralkap lei cu an him dih, tiah theih a si.

Thawng dang: Tedim Peng, Mualpi Khua Ah Kum 12 Nu Ngakchia Pakhat SAC Ralkap Nih An Tlaihhrem. Chinram, Tedim peng, Mualpi khua ah kum 12 nu ngakchia pakhat cu nizan July 5 ah Kalaymyo in Chinram lei ah rallam sial in a kai mi SAC ralkap nih an tlaihhrem, tiah Chin World nih a ṭial. July 4 ni ah khan Kalaymyo in motor he Chinram lei ah SAC ralkap pawl rallam an sial caah kum 12 nu ngakchia le a chungle pawl cu lo thlam an riak.

Nizan July 5 ni ah SAC ralkap nih inn tlun khawh a si cang an ti hnu ah a nu nih inn va zoh ding in a fial i an innchung ah SAC ralkap pahnih nih luhhnawh in an tlaihhrem. Bawmh hal in a au nain a pawngkam um mi SAC ralkap nih an chanh duh lo,” tiah tualchung mi pakhat nih a chim. Tlaihhrem a tong mi i hringtu a nu le nungak pakhat zong tlaihhrem an timh hna nain an zaam manh. Khua mi cheukhat nih SAC ralkap Commander pa an va ton i thil sining an chimh hnu ah chekhlatnak an tuah colh.

Kum 12 ngakchia nute cu tangka an pek. Tlaihhrem hmang mi SAC ralkap pahnih cu puan in an tuam hna i motor cung ah an khin hna, cu hna pahnih nih an hruk mi Uniform ah cun zeibantuk chingchiahnak(ṭazeih) hmanh a um lo. SAC ralkap pawl cu Kalaymyo lei ah an kir colh,” tiah tualchung mi pakhat nih cun a chim chap. SAC ralkap pawl cu July 4 ni ah motor 6 in Kalaymyo in Chinram, Tedim lei ah an kai i nizan July 5 ni ah an kir ṭhan, tiah theih a si. Crd-the chin post