India Cozah Nih Paletwa Le Sittwe Tiang Electric Mei Pek Ding In Timhlamhnak An Ngei
India cozah nih Chinram thlanglei, Paletwa le Rakhine ramkulh, Sittwe tiang Electric mei pek an duh caah Mizoram cozah he i bawm in tuahpiak ding in timhlamhnak an ngeih kong, Ministry of External Affairs, Joint Secretary B Shyam nih a chim. Mizoram ramkulh a phan mi India cozah, Ministry of External Affairs, Joint Secretary B Shyam nih September 12 ni ah Mizoram ramkulh cozah, Power Minister Pu F. Rodingliana cu a zung khan chung ah biaruahnak a ngeihpi i atu bantukin ceihmainak an ngei. India cozah nih Chinram, Paletwa khuapi tiang Eletric mei a pek hnu ah Rakhine ramkulh.
Sittwe tilawng dinhnak tiang pek chih a duh caah Mizoram cozah cu rianṭuanpi ding in a sawm, tiah Mizoram cozah Information Center nih an thanh. India cozah, Ministry of External Affairs, Joint Secretary le Mizoram cozah, Power Minister cu Myanmar le Bangladesh ram chawleh chawhrawlnak a tlamtlin khawh nakhnga rianṭuan ningcang zong an i ceihmai i atu lio ah kalpi cuahmah mi Kaladan Multi Modal Transit Trasport Project dirhmun le rianhma a kal khawh nakhnga rianṭuan ding cingcang zong an i ceihmai, tiah theih a si.
Thawng dang: Shan ramkulh thlanglei, Kalaw khuapi le Inle hmunram ah tilian a chuak i minung 80 leng an nunnak a liam, tilian ruang ah cun mimung 80 leng an tlau i an hmuh rih hna lo kong, mi bawmchantu phu nih an chim. Nizan September 12 zinglei in Kalaw khuapi ah tilian a chuak i nihin September 13 tiang ah minung 60 leng an thi, minung 80 leng an tlau, tiah mi bawmchantu phu nih cun an chim. Cu bantuk ṭhiamṭhiam in Nyaungshwe khuapi zong ah tilian a chuak i a kua ningpi in ti nih a phum caah nihin September 13 zinglei tiang ah khuapi laifang tiang tilawng in kal a hau.
Cu pin ah Nyaungshwe peng, Inle hmunram chung khuate vialte ti nih a phum dih i Inntein khua ah minung 20 leng an thi, tiah tualchung mi nih an chim. Inle hmunram chung i tilian hartong mi tualchung mi pawl cu nichuah lei kam tlangcung khuate le ti nih a phanh rih lonak phungki sianginn ah an dorter chung hna i zuaral in eidin tirawl, hnipuan le puanlum bawmhchanh an herh, tiah mi bawmchantu phu nih an chim. Myanmar ram hmun kip ah tilian a chuah ruang ah ngakchia tete telh in minung tam tuk har an tong i Typhoon Yagi thlichia a hran ruang ah September 19 tiang ruahpi a tam kho mi a si i atu nakin ti zong a kai kho mi a si caah ralring tein um a herh kong, khuacaan zohnak zung nih ralrin peknak an tuah.
