Iran President Le Foreign Minister Cit Mi Helicopter A Tla
Iran ram President le Foreign Minister tel in Cozah chungtel bawi pawl cit mi helicopter a tla i, aa cit mi chung ah a nung mi an um lo tiah Iran media hna cherhchan in media tampi nih an ṭial. Iran President Ebrahim Raisi le Foreign Minister Hossein Amir Abdollahian tel in bawi ngan pakua nih an i cit mi helicopter cu May 19 ah Iran le Azerbaijan ramri ah a tla. A tla mi helicopter cu van lei in an hmuh cang nain aa cit mi chung ah a nung mi an um lo tiah Iran media nih an langhter.
Iran president cu tidil project zoh ding in Iran le Azerbaijan ramri in aa thawh i May 19, chunhnu sml. 1:00 hrawng ah an i cit mi helicopter a tla tiah Iran Cozah media nih a thanh. President le Foreign Minister an thih le thih lo kong ah Iran Cozah nih phung ning in thanhnak a tuah rih lo. Van lei in hmahthlak mi helicopter rawk hmanthlak cu Iran media nih an langhter i Helicopter a tlak lio ah hin nikhua a chia i chum chah ngai in a zaam tiah theih a si.
Nikhua a chiat tuk caah van lei in kawlnak cu an ngol i commando ralkap le chanhchuahtu phu hna nih helicopter tlaknak hmun ke in an kawl hna tiah theih a si, crd-THP thawng dang rel chap, Buthidaung peng chung SAC ralkap camp dihlak le TOC hmunpi kan laak cang tiah AA nih a thanh ,Rakhine ramkulh, Buthidaung peng chung SAC ralkap camp dihlak in kan laak i, Buthidaung peng dihlak kan kutcung ah a um cang tiah AA nih nihin ah a thanh.
Rakhine ramkulh, Buthidaung peng chung ah Tactical Operation Command-TOC (Bioha) hmunpi tel in SAC ralkap battalion a taang mi dihlak cu May 18 chun sml. 12:00 ah AA nih an laak dih cang tiah theih a si. Nihin ah AA nih an laak mi camp hna cu: Buthidaung TOC hmunpi, 378th miakpi battalion, LIB-234, LIB-345, LIB-352 hna tel in SAC ralkap battalion camp an si. May 14 ah LIB-353, LIB-535, LIB-263 le LIB-233 SAC battalion pali cu an rak laak cang.
May 13 ah No. 3 ramri hngak palek battalion le May 16 ah No. 8 ramri hnak palek battalion zong an rak laak cang tiah theih a si. SAC ralkap pawl cu khuate lei le Buthidaung peng chung ah an zaam caah tualchung mi hna nih ralring tein um ding zong AA nih a thanhchih.
