Iran President Tal In Bochanmi Minung 9 Nunnak A Liam
Helicopter cansualnak in iran president ibrahim paisi le ramdang minister hna telhchih in minung 9 an nunnak a liam, Iran President Ibrahim Paisi le ramdang Minister Hossein Amir Abdollahian telhchih in cozah nawlngeitu hna cit mi helicopter cansualnak tong in a tlak caah Iran President telhchih in a chung aa cit mi dihlak an thi, tiah Iran ṭuanvo ngeitu hna nih 2024, May 20 ah an langhter.
Iran President Ibrahim Paisi hi Iran nichuah lei Azerbaijan ramkulh ah a tlawng tiah kan theih. Iranian TV: nih a langhter ning cun President Ibrahim Paisi le ramdang Minister hna cit mi helicopter hi vawlei ṭum aa timh ah cansualnak tong in a tla tiah theih a si. Helicopter cansualnak hmun hi Iran khuapi in meng 375 tluk aa hlatnak Tehran thlanglei hmunram Inrina khuapi Jolfa pawng ah a si. 2024, May 20 ah ṭuanvo ngeitu hna nih helicopter tlaknak hmunhma zohfelnak an tuah i helicopter a kangh dih pin ah a chung aa cit mi minung 9 an dihlak in an thi” tiah ṭuanvo ngeitu hna nih Reuters ah an chim.
Iran President Ibrahim Paisi le ramdang Minister cozah officer hna ruahlopi in an nunnak a liam caah vice president, Mohammad Mokhbar nih buaktlak in President rian a ṭuan chung lai i ni 50 chung ah President thimnak a tuah lai, tiah theih a si. Helicopter cansualnak in Iran President Ibrahim Paisi, ramdang Minister Hossein Amir Abdallahiyan, Security Officer Raisi Mehdi Mousavi, pengkomh nawlngeitu Mohammad Ali al-Hashem, pengkomh khuabawi pa Malik Rakhmati le helicopter ṭuanvo ngeitu an dihlak fonh minung 9 an nunnak a liam, tiah an langhter.
thawng dang rel chap, Buthidaung peng chung SAC ralkap camp dihlak le TOC hmunpi kan laak cang tiah AA nih a thanh ,Rakhine ramkulh, Buthidaung peng chung SAC ralkap camp dihlak in kan laak i, Buthidaung peng dihlak kan kutcung ah a um cang tiah AA nih nihin ah a thanh. Rakhine ramkulh, Buthidaung peng chung ah Tactical Operation Command-TOC (Bioha) hmunpi tel in SAC ralkap battalion a taang mi dihlak cu May 18 chun sml. 12:00 ah AA nih an laak dih cang tiah theih a si.
Nihin ah AA nih an laak mi camp hna cu: Buthidaung TOC hmunpi, 378th miakpi battalion, LIB-234, LIB-345, LIB-352 hna tel in SAC ralkap battalion camp an si. May 14 ah LIB-353, LIB-535, LIB-263 le LIB-233 SAC battalion pali cu an rak laak cang. May 13 ah No. 3 ramri hngak palek battalion le May 16 ah No. 8 ramri hnak palek battalion zong an rak laak cang tiah theih a si. SAC ralkap pawl cu khuate lei le Buthidaung peng chung ah an zaam caah tualchung mi hna nih ralring tein um ding zong AA nih a thanhchih.
