Kalay Khuapi Ah Ti Aa Lio Mi Mino 20 Leng SAC Nih An Tlaihkhih Hna
2024, June 9 zanlei suimilam 2:00 tluk ah Sagaing ramṭhen, Kalay khuapi chung ah SAC ralhrang nih ti aa lio mi mino 20 leng an tlaihkhih hna i Dah-Kah-Sah sakhan ah an kalpi hna, tiah theih a si. “Zeiruang ah dah an tlaihkhih hna timi konglam fianghlang in kan thei kho lo, a voikhat naak in Dah-Kah-Sah hmunhma ah an kalpi hna, khoi ka an kuat ṭhan hna lai kan thei lo, tiah tualchung mi nih an chim. “An tlaihkhih mi hna hi mino (kum 20) tluk hrawng an si hna (Nu) cheukhat zong an i telchih” tiah mit hmutu pakhat nih a chim.crd- Lungmili Post.
Thawng dang: Global Matupi CDF Supporting Committee he pehtlaihnak a ngei lo i a ṭangṭi lo mi Chinland Defense Force – Matupi Brigade 1 nih CDF-Matupi Brigade 2 telh in CNA le mizapi ruahnak zeihmanh hal hmasa lo in miphun dang le ramkulh dang hriamtlai phu Rakhine ralkap AA i sawm riangmang in Matupi peng chung ah kahdohnak kalpi an timh mi cu Global Matupi CDF Supporting Committee kan hna a tla lo i fak piin duhlonak kan langhter, tiah Global Matupi CDF Supporting Committee nih nizan June 8 ah an thanh.
Global Matupi CDF Supporting Committee nih an thanh mi ah cun, “Hi hnu pinlei ah AA kong he pehtlai in a cang ding mi Chinram ramkhel buainak, zatlang le nuphung hnahnawh peknak le aa pehzul ding mi buaibainak dangdang vialte cu CDF-Matupi Brigade 1 nih nan liang cung ah i khinh in ṭuanvo nan laak dih a hau lai, cu kong ah cun CDF-Matupi Brigade 2 hmunram le mizapi nih kan theihpi hna lai lo i pehtlaihnak zeihmanh a um lai lo tiin mizapi kan in theihter hna,” tiah Global Matupi CDF Supporting Committee nih an langhter.
Global Matupi CDF Supporting Committee cu a liamcia 2021 July 30 ni ah ramchung ramleng um Global Cingtlang CDF Supporting Committee, Global Matu Doem Community, International Dai CDF Supporting Committee le International Ai-daak Community tiin phu ngan phu 4 nih rak dirh mi a si i Chinland Council dirkamh in CDF-Matupi Brigade 2 tang a um mi Battalion 2, Battalion 3, Battalion 4 le Battalion 6 tha pe in a bawmchantu Committee a si. Chinland Defense Force – Matupi Brigade 1 tang ah a um mi Battalion 1 le Battalion 5 cu Chin hriamtlai phu unau (Chin Brotherhood) chungtel an si ve i atu lio Matupi peng kahdohnak kalpi timh mi ah Rakhine ralkap AA a sawmtu phu an si.crd- The Chin Post.
