Kalaymyo Ah SAC Ralkap Nih Mino An Tlaih Hna I Hramhram In Training An Pek Hna
Sagaing ramṭhen, Kalaymyo ah SAC ralkap nih ralkap tlakter ding ah mino an tlaih hna i hramhram in training an kaiter hna ruang ah nulepa an lungre a thei ngai hna. May thla hramthawk ah SAC nih voi hnih tiang tlaih a tong mi mino training an kaiter cang hna, tiah theih a si. “Kalaymyo khuapi ah SAC nih training a pek mi hna lak ah a tam-u cu SAC ralkap a dirkamh mi le hramhram in tlaih mi mino an si hna caah fale ca ah nulepa an lungre a thei ngaingai,” tiah Kalaymyo, Aungthitsa sang mi nu pakhat nih a chim.
SAC nih Kalaymyo sang cheukhat ah ralkap tlakter ding ah kum tling mi mino mincazin cu sangbawi pawl an laakter hna. Zanlei suimilam 6:00 hnu ah aa chawk mi mino pawl cu an ral khun hna i ralkap tlakter ding ah an tlaih hna, tiah theih a si. “Khual cazin kan check lai tiin inn kip ah lut in mino pawl an tlaih hna, cun khuapi chung check gate ah hramhram in an tlaih hna ruang ah nulepa an lungre a thei i a cheu cu a himnak hmun ah an zaamter hna,” tiah tualchung mi nu pakhat nih a chim.
Atu lio Kalaymyo cu SAC ralkap nih khuachung ah chekhlatnak an tuah peng i Kalay peng chaklei zong ah tualchung hriamtlai phu he an i kap peng i kaphnih kar kahdohnak a fak ngai, tiah theih a si. Thawng dang relchap, CDF-Kanpetlet nih kanpetlet peng ah kahdohnak tuah lo ding in cathanh an chuah, Chin Defense Force – Kanpetlet nih anmah lungtlinpinak le theihpinak tel lo in Kanpetlet peng chung ah zei bantuk hriamtlai phu hmanh nih mizapi lemsoi, sakhaan ser(chiah) le kahdohnak tuah an kham kong nihin May 21 ah ralrinpeknak cathanh an chuah.
CDF-Kanpetlet nih ralrinpeknak cathanh an chuah mi zulh duh lo ruang ah dohthlennak a tuahtu ralkap phukhat le phukhat kar thisen chuah in buainak a chuah sual ahcun nawl a zul lotu phu cu mawhphurh an si lai, tiah an langhter chih. CDF-Kanpetlet hi Chinland Council ah aa tel mi le Chin Brotherhood lei ah aa tel mi an um i atutan cathanh a chuahtu phu hi Chin Brotherhood ah aa tel mi an si, tiah theih a si.
