Kan Unau Paletwa Peng In Mino 200 Hrawng Hakha Lei Panh In An Kal Hna

Chinram, Paletwa peng in mino 200 hrawng cu Mizoram ramkulh, Siaha khuapi ah lut in Siaha–Niawhtlang khua an pal hnu ah Chinram, Thantlang peng, Tluangram khua an phan i Hakha khuapi lei ah an kal kong ramri um mi nih The Chin Post ah an chim. Atu i Hakha khuapi fuh in a kal mi hna hi mino deuh lawngte an si hna i May 8 ah 80 hrawng le May 9 ah 20 hrawng tiin nu he pa he minung 100 hrawng cu Paletwa peng in Tluangram an phanh hnu ah.

Tluangram khua motor ngei nih Thantlang peng Congthia khua ah an kalpi hna,” tiah kan thawng laknak nih a chim. Paletwa peng in Hakha khuapi fuhpanh in a kal mi hna nih cun, Paletwa peng ah um awk a ṭhat ti lo caah Hakha in Yangon lei ah kan kal lai, tiah an chim. Nihin tiangah Hakha lei panh in a kal mi an um peng rih i hmanung bik thawng kan hlat tiang ah minung 200 hrawng an phan cang, tiah theih a si.

Thawn dang deuh rel chap- paletwa peng ah sac ralkap kah mi hriamngan kuan cu ngakchia nih an i lenh lio ah a puak i ngakchia 4 an thi Chinram, Paletwa peng Khawea khua ah SAC ralkap nih an kah mi hriamngan kuan a puak rih lo mi cu ngakchia nih lentecelhnak ah an i lenh i, hriamngan kuan cu puak in ngakchia pa pali(4) an thih pinah pakhat hliam a tuar, tiah theih a si. May 8 zing ah ngakchia pa hna nih cun khuapawng ramlak ah a puak rih lo mi hriamngan kuan cu an hmuh i, cu kuan cu lentecelhnak i an hman lio ah a puak, tiah theih a si.

A thi mi ngakchia hna cu kum hra mi Aung Min Thun le Aung Lin Soe, Kum 8 mi veve Aung Lin Thun le Lin Myat hna an si i, kum 8 mi Aung Soe Lin cu hliam a tuar. Hriamngan kuan an hmuhnak hmun hi SAC ralkap sakhan he aa naihnak ah a si i AA le SAC ralkap an i kah tawnak hmun a si, tiah tualchung mi nih an chim, crd- The Chin Post.