Kanpalet Peng Ah Ralhrial Minung 38 Cu An Zaam Naak Hmun Ah SAC Ralhrang Nih An Tlaih Hna
Chin ramkulh, Kanpalet peng, Kyindwe khuapi pawng Ung khua mi ralhrang cunglei kahdohnak ruang ah ramtang a zaam mi hna cu SAC ralhrang nih 2024, May 14 ah an kalhnawh hna i an tlaihkhih hna tiah theih a si. SAC ralhrang nih an zaam naak ah kalhnawh in an tlaihkhih mi ralhrial hna cu pa 11 le nu 27, an dihlak fonh minung 38 an si, tiah an langhter. A liamcia caan zeimawzat chung ah SAC ralhrang nih cunglei in khua chung ah hriamngan an kah i tualchung mi hna cu hmunhimnak kawl in ramtang ah an zaam hna nain 2024, May 14 ah SAC ralhrang nih an zaam naak hmun ah an kalhnawh hna i ralhrial minung 38 cu an tlaihkhih hna” tiah Kanpalet khua mi pakhat nih a chim. Crd- Lungmili Post .
Thawng dang: Chinland Council Cu CDF-Matupi Brigade-2 Nih An Dirpi Kong Cathanh An Chuah. Chin ramkulh, Matupi peng hrambunh CDF-Matupi Brigade-2 nih Chinland Council an dirpi kong nizan May 14 ah cathanh an chuah. “2024, April 11 in 12 tiang CDF-Matupi Brigade-2 in Battalion commander hna le tualchung ukhruaitu phu hna cu tonpumhnak kan tuah i kan dirhmun le phunghram pawl kan ṭial dih hnu ah Chinram ramkhel dirhmun ah Matupi peng mizapi tamdeuh nih an duh mi Chinland Council cu kan dirpi” tiah Chinland Defense Force – Matupi nih an langhter.
CDF-Matupi Brigade-2 ah Battalion 2, Battalion 3, Battalion 4 le Battalion 6 hna i tel. A luancia February thla ah CDF-Matupi nih a voi 3nak tonpumhnak kan tuah lio ah Chinram ramkhel dirhmun ah Chinland Council le ICNCC ah kan ruahnak aa dang i CDF-Matupi cu Brigade-1 le Brigade-2 ah kan dir, tiah an langhter. CDF-Matupi Brigade-1 ahcun Battalion 1 le Battalion 5 an ifonh i.
April 10 ah Chin Brotherhood ah an vaa fonh, tiah theih a si. Cu pin ah CDF-Matupi cu ramchung ramleng mizapi bawmhnak thawng in uknak ṭhalo hrawnh i tlukruannak le mahte khuakhan lairelnak, zumhtlak mi Federal ramkomh a chuah khawh nakhnga ral kan tu kho, tiah Chinland Defense Force – Matupi nih cathanh an chuah mi ah an langhter chih.
