Khuapi 350 Leng A Um Mi Chung ah Khua 98 Lawng SAC Nih An Uk Khawh Cang
Myanmar ram chung khuapi 350 leng a um mi chung ah khuapi 98 lawnglawng hi SAC nih an uk khawh cang tiah NUG Defense Minister U Ye Mon nih a chim. A tu lio dothlennak i teinak kan hmuh ning cu Phun 4 ah then khawh asi. A phun khat nak cu Kawlram chung khuapi vialte chungin khuapi 75 cu dothlennak ralkap hna kut ah a dihlak in a phan cang. A pahnih nak cu khuapi 105 chung ummi SAC ralhraang hna cu khua leng an chuak ngam tilo i an riah hmun bak lawng ah hmun an khuar cang.
A pathumnak cu a tu lio ah khuapi 74 chung ah dothlennak ralkap le SAC karlak ah kahdohnak a chuak cuahmah i SAC nih a dihlak in control a tuah khawh mi hi khuapi 98 lawng a si cang tiah U Ye Mon nih cun a chim. Hi thil hi kan zoh tik ah SAC nih hin khuapi 100 hmanh a control kho ti lo i zatuak in tuak ah cun 28% lawng a uk khawh mi a si cang. Kan hnu te zong ah khan SAC ralhraang hna i sakhaan a lian bik mi a si mi Lashio hrambunh North Eastern Command pi cu dothlennak ralkap hna kut chung a phan cang.
Cu nih a langhter mi cu zei bantuk SAC sakhaan hmanh nih dohtlennak ralkap hna hi a kham kho lo tinak a si, cu caah dotlennak rakap hna nih teinak kan hmuh ding hi a nai te cang tiah U Ye Mon nih cun a chim. Thawng hlun relchap duh mi, Chinland Cozah ralkap bu nih a tu lio an kalpi cuahmah mi Tilim Operation – 4 zarhhnih leng caan chungah SAC ralhraang minung 30 nak tlawmlo an thi cang i meihthal zun 20 leng le kuanzen tampi laak a si leng ah ralhraang minung 10 lengh tlaih an si kong Salai Htet Ni sin in theih a si.
A tu cazin cu Tilim Operation a rak i thok July 22 in nihin August 8 karlak i a cang mi chungin a si i a tu hi Thantlang khuapi chung zong ah kaphnih kar kahdohnak faak piin a chuak cuahmah tiah theih a si. “Operation kan thok sinin Hakha-Thantlang kar ah siseh,Thantlang khuapi chung ah siseh kahdohnak chung ah SAC lei hi a tlawm bik minung 30 an thi cang.meithal tu hi cu zun 20 in 30 karlak hrawng a si lai.kuan zen tu hi a tam ngai laak a si.IB 269 sakhaan kan laak ah khan kuazen tamngai kan laak leng ah SAC ruak 4/5 cu kan laak.”tiah Zalen ah a chim.
A tu ah Thantlang khuapi chung hmun cheukhat ah SAC nih hmun an khuar i Thantlang khuapi an sungh lo nak hnga hriampi le Vanlei he tiah SAC nih faak piin kah a bawmh cuahmah tiah theih a si. “Thantlang hi kaphnih caah a biapi ngai ngai mi khaupi a si.Hakha an sungh lo nak ding ah Thantlang hi a biapi ngai ve. Cu bantuk in kan mah ca zong ah a biapi ve. Cu caah SAC nih hin IB 269 sakhaan kan laak in nihin tiag ah vanlawng in voi 10 leng bomb a rak thlak cang.
A dongh nak a si caah anmah lei zong an ti khawh chung an chuah ve ko lai. Kan mah lei zong nih a dongh tiang nam dingin timhlamh a si.” tiah a chim. A tu tiang a kal mi Operation chungah hin Chinland Cozah ralkap lei in zeimawzat nih ram le miphun caah nunnak an pek ve cang.hi kahdohnak cu a dongh tiang kalpi a si lai caah ram chung ramleng um mizapi nih mah le ti khawh nak cio in itel cio ding in le Thantlang khuapi chung um mi SAC ralhraang hna nih a ran nak in hriam chia dingin Salai Htet Ni nih cun biacah nak a tuah fawn.
