KIA Nih Kachin Ram Chung Um SAC Sakhan 100 Leng An Laak
Kachin ramkulh ah thla 2 le cheu reng lo kahdohnak caan chung ah Kachin ralkap KIA hruai mi dohtlennak hriamtlai phu hna nih SAC ralhrang sakhan hme mi le ngan mi dihlak fonh 105 an laak khawh cang, tiah KIA thawng laaknak hrampi nih a chim. 2024, March 7 in May 23 tiang kahdohnak caan chung ah KIA hruai mi dohthlennak hriamtlai phu hna nih SAC ralhrang sakhan ngan mi le hme mi he fonh ah a dihlak sakhan 105 an laak khawh cang i atu Tuluk-Myanmar ramri um Lwegel khuapi.
Sinbo khuapi le Sumprabum khuapi telh in a dang khuapi pawl zong KIA/KIO nih tlamtling tein a humhak cang. Cu pin ah Kachin ramkulh lei pehtlaihnak ah a bik in an hman mi lam pawl zong KIA hruai mi dohthlennak hriamtlai phu hna uknak tang ah a um cang, tiah theih a si. “Waingmaw peng ahcun SAC ralhrang Khah-Lah-Yiah 58 sakhan 1 lawng a taang cang. Kahdohnak cu Myitkyina khuapi a phan deng cang. Kahdohnak a fahnak hmun hna cu Mansi, Momauk, Bhamo, Hpakant, Puta-O, Danai, Sumprabum, Tsawlaw, Shwegu, Waingmaw le Myitkyina pengchung hna ah an si i an uk khawh cang mi khuapi hna zong an um.
A bik in pehtlaihnak ah hman mi lampi pawl zong KIA uknak tang ah a um cang. SAC ralhrang pawl cu kahdoh an ton caan paoh ah an sung i zaam, hriamnam chiah in i ap le vanlawng in bomb thlak lawng hi an tuah khawh mi a si ko” tiah KIA thawng laaknak hrampi nihcun a chim. Thawng dang rel chap, Chin National Army(CNA) hruai mi Chin hriamtlai ṭangṭi phu nih an laak cang mi Tonzaang khuapi chung ah SAC nih thazaang an chap caah kahdoh thawng a dai rih lo i nizan May 22 zan zong ah an i kap rih, tiah theih a si.
Nizan May 22, zan suimilam 10:30 hrawng ah kahdoh thawng theih a si rih i Tonzaang khuapi chung Khawlaikuzan sang ah inn hnih a kaang, tiah theih a si. Kahdohnak ah kaphnih in thi le hliamtuar kong theih a si lo. Nizan May 22 chun ah SAC nih vanlawng in Tonzaang peng ah ralkap thazaang an chap i Tonzaang khuapi pawng ah ralzaam in a um mi cheukhat zong lam hmuhsaktu ding ah an kalpi hna i nihin May 23 zinglei ah an thlah ṭhan hna, tiah theih a si. Tonzaang peng ah kahdohnak pehzulh in kalpi a si rih caah tualchung mi a tamdeuh cu a himnak hmun kawl in an zaam i an harsa ngai cang hna, tiah theih a si.
A luancia May 16 ni thawk in a chuak mi kahdohnak ruang ah Tonzaang khuapi le a kiangkap tualchung mi 5,000 hrawng cu a himnak hmun kawl in an zaam hna, tiah theih a si. A luancia May 21 ah Tonzaang khuapi cu Chin ralkap CNA le ṭangṭi phu nih an rak laak i meithal zuun 50 leng an laak pin ah tangka Kyats sing 3,000 hrawng zong an hi laak chih, tiah theih a si. Thawng dang relchap, tamu peng ah kuki hriamtlai 4 hna cu sac ralhrang nih an thah hna, Sagaing ramṭhen, Ṭamu peng, Kyunpinthar (Teijanh) khua ah Kuki National Army-Burma (KNA-B) ralkap chungtel 4 hna cu SAC ralhrang nih nizan 2024, May 21 zing ah an thah hna, tiah theih a si.
Kuki hriamtlai he naihniam pakhat nih “KNA-B ralkap 4 hna cu Kyunpinthar (Teijanh) khua ah Dalan nih thawng an pek hna ruang ah SAC ralhrang pawl nih an rak bawh hna i atu bantuk in thah an ton hi a si, arfi pali an ṭil, ka lung ṭha lo ngai” tiah Khonumthung ah a chim. Nunnak liam mi Kuki National Army-Burma (KNA-B) ralkap 4 hna cu Pa Man Kyaw, Pa Daniel, Pa Hao Chin Pao le Pa Lun Min Thang hna an si, tiah theih a si. Tamu peng, Myothit khuapi um SAC ralhrang sakhan cu dohthlennak hriamtlai phu hna nih kahdoh in an laak khawh caah mah sakhan in a zaam mi.
SAC ralhrang le an kuttang Shanni ralkap (SNA), pyusawhti pawl le Meitei hriamtlai pawl cu Kyunpinthar (Teijanh) khua ah umhmun an khuar hna. Kuki National Army (KNO/KNA-Burma) cu Kuki hmunram laak khawh ṭhan ding le Kuki ramkulh sersiam ding in a liamcia 1988, February 24 ah rak dirh mi a si i atu Myanmar ram pau dohthlennak zong ah mizapi ralkap hna he hmunkhat ah ṭangṭi in ral an doh kong zong theih a si.
