KIA Ralbawi Zik Lt. General R Hkawng Lum Thin Zawtnak In Mual A Liam
Kachin Independent Army (KIA) Ralbawi Zik (Chief-of-Staff) Lt. General R Hkawng Lum cu tu zanlei sml. 6:00 fai ah thin zawtnak in mual a liam tiah Myitkyina News Journal nih a ṭial. Lt. General Hkawng Lum cu thin damlonak a ngei mi a si i tu zanlei ah, an inn ah a thi tiah theih a si. KIA ralbawi zik a si ko. Thin zawtnak in mual a liam. Nai te ah sii-inn ah a va thlop i a rak kir. Tu zanlei sml. 6:00 fai ah a thi,” tiah Colonel Naw Bu nih a chim.
Kum 60 hrawng a si mi Lt. General R Hkawng Lum cu 1988 ah KIA ah a rak lut i atu ah Chief-of-Staff rian a tlai lio mi a si tiah kan theih. Photo: MOD (Lt. General R Hkawng Lum le NUG Runvennak Minister nih, KIA nih SAC sin in an laak mi Bumre Bum camp an rak zohnak hmanthlak a si. Thawng dang relchap, tanintharyi le bauk-pin peng ramri um ralkap 1020 tlang sakhaan dothlennak phu pawl nih an lak, Tanintharyi ramṭhen.
Tanintharyi peng le Bauk-pin peng ramri um SAC 1020 tlang sakhaan cu dothlennak phu pawl nih an lak tiah Black Cobra phu nih an thanh. April 30 thawk in SAC ralkap nih hmunhma an khuarnak Point 1020 tlang sakhaan cu Black Cobra phu nih kah hram an thawk i May 11 zinglei ah tlamtling tein an lak khawh hi a si. Cu sakhaan ah Baukpin khua hrambunh MOC 13 kuttang IB 555, LIB 559 le IB 432 hna nih hmunhma an khuar i sakhaan an sungh nakhnga lo.
SAC nih van lei in fak ngai in kahdohnak a tuah nain ni 12 a rauh hnu ah sakhaan chung um ralkap pawl nih sakhaan an zaamtak. Cu sakhaan zohfelnak an tuah lio ah hriam le kahdohnak thilri pawl an lak khawh i sakhaan chung ah SAC ralkap ruak an phumnak pawl zong an hmuh, sakhaan a zaamtak mi ralkap pawl cu Black Cobra phu nih an dawi hna i bawmhnak pek ding a ra mi phu zong an kham khawh hna tiah theih a si.
Sakhaan lak kahdohnak chung ah KNLA-PDF phufonh Black Cobra Column, Belik Province PDF 1, Black Cobra Wings Drone phu hna bawm in kahdohnak an tuah a di i dothlennak phu lei 1 a ke ah hliam a tuar tiah theih a si.
