Kum 13 Fai Mino 8 Cu Hram Hram Ralkap Tla Dingin ZRA Nih An Tlaih Hna
ZRA nih kum 13 fai mino 8 cu hram hram ralkap tla dingin an tlaih hna i an kal pi hna. Chin ramkulh,Tedim peng Tungzang khuate i kum 13 tluk mino kum tlinglo tete minung 8 cu Zomi Revolutionary Army – Eastern Command (ZRA – EC) nih July 6 ah khan an tlaih hna i an kal pi hna tiah thawng theih a si. Tedim khua he meng 20 tluk aa hlat nak in a um mi Tungzan khuate ah hin ZRA-EC hna cu July 6, Zarhteni ah khan arak phan i cu khuate i ngakchia hna cu camcawhfung an zuh ter hna hnu ah minung 8 an kalpi hna hi a si.
Khuachung ah inn khat hnu in khat in an kai i pa ngakchia an umnak poah camcawhfung an zuh ter hna.tang 4/5 a kai lio mi tete an si hna.a tu cu tang 4 in a cunglei pa ngakchia pawl khua ah an um ngam ti lo i an zaam hna.” Tiah Tedim khuami pakhat niha chim. ZRA-EC nih ngakchia pawl an tlaih hna i an kalpi hna caah Tungzang khuate tualchungmi hna zong khua ah um ngam lo in an tlizam hna tiah theih a si.
Cu bantuk thiam thiam in Tonzang peng Cikha khua telhin Vom khute,Tanhsawl khuate,Khuadam khute hna zong ah ZRA ralkap lut dingin ZRA –EC lei nih hram hram in min cazin an laak hna tiah theih a si. Thawng dang: Lasho Kahdohnak a Fah caah Ralzaam Mawtaw Tampi an i Hreng. Shanram chaklei Lasho khua ah kahdohnak a fah caah Lasho khua in chuah aa tim mi ralzaam mawtaw za leng cu fawi tein chuak kho lo in an i hreng hna, tiah theih a si.
Nizan July 7, zaan sml. 7:00 hrawng ah Lasho khuavengtu SAC ralkap bu lak ah abiapi bik pakhat ah aa tel mi Kha Ma Ya (507) cu MNDAA nih an laak khawh. MNDAA nih Kha Ma Ya (507) SAC ralkap sakhaan an laak thawk in Lasho ah hram a bunh mi SAC ralkap bu Norhteastern Command Center in Lasho khuachung ah hriampi pehzul in an kah caah khuami tampi cu an zaam hna. Nihin July 8 zinglei thawk in Lasho khuami tampi nih mawtaw in khua an chuahtak i mawtaw a tam tuk tik ah chuak kho lo in an i hreng hna.
Tualchungmi pakhat nih, “Lasho SAC ralkap sakhaan in hriampi pehzul in an kah. Jet Fighter zong Lasho khua cung ah a vel lengmang. Nihin zinglei thawk khan khuami pawl zaam hram an tawk. Atu hi khualuhnak signboard tiang kha lam a pit. Lasho khuami 60% nih khua an zaamtak cang,” tiah a chim. Voi khat te ah Lasho khuami a thongthong in an zaam caah Lasho in Madalay lei Bus Ticket zong Kyat 450,000 tiang a phan, tiah BBC nih a langhter.
