Kuvaro Phungning Lo In A Lut Pi Mi Pa Pakhat Nih Ṭuanvo Ngeitu Naam He A Derh Hna Caah An Tlaih

Phungning Lo In A Lut Mi Kuvaro Chekhlatnak Ah Pa Pakhat Nih Ṭuanvo Ngeitu Naam He A Derh Hna Caah An Tlaih. Mizoram ramkulh, Champhai pengkomh ah a luancia June 8 ni ah khan phungning lo in luhpi mi kuvaro Rs. nuai 13.44 man cu Champhai Custom le Assam Rifles nih Zote, Ruantlang, Tlangsam ah an tlaih i, hi kong ah hin naam he palik le Assam Rifles a derhtu pa pakhat cu tlaih a si.

Champhai Custom le Assam Rifles nih phungning lo in phurh mi kuvaro tlaih an timhnak Champhai pengkomh, Tlangsam ah tualchung mi pakhat nih cun hriamnam hmang in ṭuanvo ngeitu a rak hro hna i kut thlak a rak timh hna, aa put mi naamte an chuh hnu ah an tlaih colh ve, tiah theih a si. A luancia caan chung zong ah Custom le Assam Rifles hi thazaang hmang in kut thlak an rak tong cang i umhmun an khuarnak hmun zong hrawhpiak an rak ton bal pin ah chai chaih zong an rak tong bal, tiah theih a si. Crd- The Chin Post.

Thawng dang: Chinram, Thantlang peng ah hrambunh in hriam a tlai mi Chinland Defense Force – Thantlang nih a voi thumnak Refresher & Combat Training cu tlamtling tein an lim i nihin June 10 ah training lim lunglawmh caan(Closing Ceremony) hmannak an ngeih kong, CDF-Thantlang nih an thanh. Chinland Defense Force – Thantlang nih an tuah mi a voi thumnak Refresher & Combat Training ah cun ral lei thiamnak le raltuk cawnnak lawng si lo in Chin miphun dohthlennak kongkau, ramkhel lei hngalhkauhnak le minung hawi cung zawnruahnak phungphai (International Humanitarian Law) kong zong cawn chih a si kong, CDF-Thantlang nih an langhter.

Chinland Defense Force – Thantlang nih a voi hnihnak Refresher & Combat Training zong tlamtling tein an rak lim i a luancia April 9 ni ah khan training lim lunglawmh caan hmannak(Closing Ceremony) an rak tuah. Cu training ah cun atu bantukin Chin miphun dohthlennak kongkau, ramkhel lei hngalhkauhnak le minung hawi cung zawnruahnak phungphai (International Humanitarian Law) kong an rak cawn chih.