Lai Phung In Nawlnak Nan Tuah Lawng Ah Nawl Chuah Mi Kan In Ngolpiak Hna Lai An Ti

Lai phung in nan kan nawl lawng ah dawr khar le minung panga nak tam i pumh lo ding nawl chuah mi kan ngol lai tiah SAC nih an ti. Hakha khua, Khuathar sang chung dawr khar dih ding le minung panga nak tam i pumh lo ding in ralkap council nih nawl a chuah mi cu, Lai phung in nan kan nawl lawng ah kan in ngolpiak hna lai tiah an chim tiah kan theih. Kan hnu April thla 12, Hakha Khuathar sang ah SAC rianpek mi minister pawl motor tlar cu CDF-Hakha nih an rak kah hna. CDF nih Dawr le Biakinn an i cherhchan ti in SAC nih Hakha khuathar dawr pawl khar dih ding le minung panga nak tam i pumh lo ding in April 22 ah nawl an rak chuah.

Dawr khar ding, biakinn ah minung panga cung in but lo ding ti mi cu West Nothern Military Command nih nawl a chuah mi a si caah fawi tein a ngah lo. Lai phung in nawlnak nan tuah lawng ah nawl chuah mi kan in ngolpiak hna lai an ti. Asinain hriamtlai kap hnih kar a si caah a si kho lai lo,. atu thla (June) chung kan lut cang i a caan an chap lai maw, zeitin an tuah lai ti kan cuanh ko hna,” tiah Khuathar sangmi pakhat nih Khonumthung ah a chim.

Hakha khuanu khuapa le Khrihfa biaknak hruaitu hna nih Lai phung sathi luanh in an kan nawl lawng ah nawl chuah mi kan leet (ngol) lai tiah SAC nih an chim ti a si. 2024 April 22 in June 20 tiang dawr khar ding SAC nih hramhram in nawl a rak chuah mi ruang ah Khuathar sang chung dawr vialte thla hnih deng an khar cang hna i biakinn zong ah an i pum kho lo. Khuathar sang ah a um mi biakinn 11 cu pumh khawmh khawh lo in an um tiah theih a si.crd-the hakha post.

Thawng dang: SAC Ralkap nih Chun Lingcing ah Matupi Khua Inn le Dawr Tampi an Bauh. Matupi khuami tampi ral an zaam bantuk in khuachung mi an umnak lonak inn le dawrkhaan pawl cu SAC ralkap nih an bauh i, thilri tampi an fir len tiah theih a si. Matupi khuapi chung ah kahdohnak a chuak lai ti mi thawngpang a len caah khuami tam deuh cu hmun dang ah an zaam hna, tiah tualchungmi pakhat nih a chim. Matupi ah kahdohnak a chuak lai ti mi thawngpang a len caah Mizoram lei ah a zaam mi an um bantuk in kiangkap khuate lei ah a zaam mi zong an um.

Zaamnak kong ah harnak a tong mi pawl lawng khuachung ah an taang,” tiah a chim. Tualchungmi pakhat nih, “Ral a zaam mi hna inn lawng le dawrkhaan pawl cu SAC ralkap pawl nih chun lingcing ah an bauh i thilri an fir hna. Eidin le thilri tampi motor in an thiar i an kalpi. Cu lawng si loin, inn khat hnu inn khat ah an lut i thilri an fir len. Khuachung ah hin minung an um ti lo ti awk a si ko cang,” tiah a chim. Matupi khuachung ah a taang mi micheukhat zong nihin June 7 zinglei ah SAC ralkap nih an tlaih hna i sizung lei ah an kalpi hna, tiah theih a si.